BAKI, AzerVoice

ABŞ-ın sabiq prezidenti Donald Tramp bəyan edib ki, Qəzza müharibəsi İsrailə zərər vurur və nəticədə Tel-Əviv bu müharibəni dayandırmaq məcburiyyətində qalacaq. O, bildirib ki, döyüşlərin davam etməsi səbəbindən İsrail Vaşinqtondakı siyasi dairələr üzərində əvvəlki təsirini və nüfuzunu itirib.

AzerVoice xəbər verir ki, Tramp bu fikirləri ABŞ-ın “Daily Caller” saytına verdiyi və bazar ertəsi yayımlanan müsahibəsində səsləndirib.

“Onlar bu müharibəni bitirmək məcburiyyətində qalacaqlar və heç bir şübhə yoxdur ki, bu, İsrailə zərər verir. İsrail müharibəni qazana bilər, amma ictimaiyyətlə əlaqələr müstəvisində nüfuz qazanmır. Bu isə onun üçün mənfi nəticədir”-deyə o qeyd edib.

Tramp həmçinin vurğulayıb: “İsrail mənim 15 il əvvəl gördüyüm ən güclü lobbi təşkilatı idi və Konqres üzərində tam nəzarətə sahib idi. İndi isə bunu itirib”.

“İsrail üçün mənim qədər heç kim heç nə etməyib”. Onun sözlərinə görə, buna İranın nüvə obyektlərinə qarşı son hava zərbələri də daxildir. Həmin zərbələr Tehranın və Təl-Əvivin 12 gün davam edən müharibəsi zamanı həyata keçirilmişdi.

Xatırladaq ki, İsrail – Tramp administrasiyasının dəstəyi ilə – 2023-cü il oktyabrın 7-dən bəri Qəzzada genişmiqyaslı müharibə aparır. Bu döyüşlər nəticəsində 203 mindən çox fələstinli şəhid olub və ya yaralanıb. Onların böyük əksəriyyəti qadınlar və uşaqlardır. Bundan əlavə, 9 mindən çox insan itkin düşüb, yüz minlərlə sakin köçkün vəziyyətinə düşüb, aclıq və humanitar böhran isə minlərlə insanın həyatına son qoyub.