BAKI,VOA,Yusif Şərifzadə

ABŞ Prezidenti Donald Tramp İrana qarşı yeni və daha genişmiqyaslı hərbi əməliyyatın başlanması ehtimalını ciddi şəkildə nəzərdən keçirdiyini açıqlayıb.

VOA xəbər verir ki, Tramp bu barədə Axios nəşrinə müsahibəsində danışıb. O bildirib ki, Tehranın "hələ kifayət qədər ağrı hiss etmədiyini" düşündüyünü və hərbi variantın gündəmdə olduğunu deyib.

ABŞ Prezidenti "indiyədək görünməmiş miqyasda hücumu" nəzərdən keçirdiyini, belə bir qərarın qəbuluna yaxın olduğunu və bunun üçün hazırlıqların görüldüyünü iddia edib.

Bununla yanaşı, Tramp belə bir qərarın ciddi nəticələr doğura biləcəyini etiraf edib. O qeyd edib ki, hələlik yekun qərar verməyib və bununla bağlı konkret vaxt müəyyənləşdirməyib.

Tramp, həmçinin İsrailin belə bir əməliyyata qoşulmağa hazır olduğunu iddia edərək bildirib ki, əgər ABŞ istəsə, İsrail "iki dəqiqə ərzində" əməliyyata qoşular. Bununla yanaşı, o, ABŞ-ın hərbi əməliyyat üçün başqa heç bir ölkəyə ehtiyac duymadığını da vurğulayıb.

ABŞ Prezidenti əlavə edib ki, İsrailin mümkün iştirakı müəyyən nəticələrə səbəb ola bilər və bunun İranın cavab tədbirləri ilə nəticələnə biləcəyinə işarə edib. Tramp eyni zamanda İran rəsmilərinin danışıqlar aparmaq istədiyini iddia etsə də, onların hələlik razılaşma əldə etməyə hazır olmadıqlarını bildirib.

İran tərəfi Trampın bu açıqlamalarına hələlik rəsmi münasibət bildirməyib.