BAKI,VOA,Yusif Şərifzadə

İsrail ordusu Livan Silahlı Qüvvələrinin Zəvtər əl-Qərbiyə qəsəbəsində yerləşdirilməsinə baxmayaraq, ölkənin cənub bölgələrində hərbi əməliyyatlarını davam etdirib.

VOA xəbər verir ki, Livanın Milli Xəbər Agentliyinin (NNA) məlumatına əsasən, İsrail hərbçiləri Bint Cubeyl rayonunun Tiyri qəsəbəsində güclü partlayış həyata keçiriblər.

Məlumata görə, İsrail qüvvələri buldozerlər və hərbi texnikanın müşayiəti ilə Serbinə qəsəbəsinə doğru irəliləyib və ağır pulemyotlardan atəş açıblar.

Hadisələr fonunda Livan ordusunun komandanı, general Rudolf Haykal Zəvtər əl-Qərbiyəyə səfər edərək bölgədə yerləşdirilən hərbçilərin fəaliyyətini və sakinlərin evlərinə təhlükəsiz qayıdışının təmin olunması istiqamətində görülən işləri yerində qiymətləndirib.

Əl-Cəzirəyə danışan Zəvtər əl-Qərbiyədəki təcili tibbi yardım xidmətinin nümayəndəsi bildirib ki, indiyədək qəsəbədən üç nəfərin meyiti çıxarılıb.

Mənbənin sözlərinə görə, bölgə sakinləri təhlükəsizlik şəraitinin yaxşılaşmasını gözləyərək evlərinə qayıtmaq üçün hələ də gözləmə mövqeyindədirlər.