BAKI, AzerVoice, Səməd Əyyubov

Venesuela Prezidenti Nikolas Maduro ABŞ-ın Karib dənizinə üç hərbi gəmi göndərməsi qərarından sonra Milli Bolivarçı Milis Gücünə yüzlərlə vətəndaşın könüllü yazıldığını açıqlayıb.

AzerVoice xəbər verir ki, dövlət televiziyasına müsahibəsində çıxış edən Maduro qeydiyyat prosesinin “son dərəcə uğurlu” keçdiyini vurğulayıb. O bildirib ki, xalq ABŞ gəmilərinə qarşı böyük vətənpərvərlik nümayiş etdirir və bu proses bazar günü də davam edəcək.

Prezident milli müdafiənin əhəmiyyətini xüsusi vurğulayıb:

“Vətəni müdafiə etmək həm sevgi, həm də vətəndaşlıq borcudur. Vətənini qorumayan ailəsini də, özünü də qoruya bilməz. Ölkəsinin tarixini və suverenliyini sevməyən insanlar ruhlarını itirirlər. Mən vətənimi sevdiyim üçün yazılıram. Sən də qoşul! Yaşasın Venesuela, yaşasın vətən, yaşasın sülh!”

Buna cavab olaraq, müxalifət lideri Mariya Korina Maçado sosial şəbəkədə yaydığı bəyanatda xalqı Maduronun çağırışına məhəl qoymamağa səsləyib.

“Onlar səni guya müdafiə edirmiş kimi göstərirlər, əslində isə gücləri zəifləyir. Məhəl qoyma, görməzdən gəl, onları tək burax” - deyə, o yazıb.

Qeyd edək ki, Milli Bolivarçı Milis Gücünə qeydiyyat paytaxt Karakasla yanaşı Taçira, Varqas, Merida, Truxilyo, Barinas, Delta Amakuro və Zuliya əyalətlərində də aparılır. Ordunun tərkibinə bağlı olsa da, əsasən mülki könüllülərdən ibarət olan bu güc köməkçi qüvvə hesab olunur. Onların vəzifəsi milli müdafiəni gücləndirmək, ictimai səfərbərliyi təmin etmək və lazım gəldikdə silahlı qüvvələrə dəstək verməkdir.

Xatırladaq ki, ABŞ prezidenti Donald Tramp daha əvvəl imzaladığı sərəncamla Latın Amerikası mənşəli narkokartellərlə mübarizə bəhanəsi ilə ordunun daha geniş istifadə olunması göstərişini vermişdi. CNN-ə danışan yüksək rütbəli iki ordu rəsmisinin məlumatına görə, bu qərardan sonra bölgəyə 4 min dəniz piyadasının göndərilməsi planlaşdırılıb. Tramp avqustun 15-də Venesuela sahillərinə üç hərbi gəminin göndərilməsi əmri də imzalayıb.