BAKI, AzerVoice
İran Xarici İşlər Naziri Seyid Abbas Araqçi, ölkəsinin nüvə obyektlərinin ciddi şəkildə ziyan gördüyünü və ABŞ ilə nüvə danışıqlarını yenidən başlatmağa hazır olduqlarını bildirib.
AzerVoice xəbər verir ki, Araqçi bu barədə Tehranda xarici ölkələrin səfirləri və diplomatik nümayəndəlikləri ilə keçirilən görüş zamanı danışıb.
O, İsrail və ABŞ-ın Beynəlxalq Atom Enerjisi Agentliyinin (BAEA) nəzarətindəki nüvə obyektlərinə hücum etdiyini bildirib və bu hücumların İran obyektlərinə böyük ziyan vurduğunu qeyd edib. Onun sözlərinə görə, bu hücumlar beynəlxalq hüquqa və Nüvə Silahlarının Yayılmasının Qarşısının Alınması Sazişinə zərbə vurub.
Araqçi, İranın nüvə silahı istehsalına yönəlmədiyini və bu istiqamətdə dini lider Ayətullah Seyid Əli Xameneinin fətvasına əsasən belə bir niyyətin olmadığını vurğulayıb. O, əgər İran bu yolu seçmək istəsəydi, indiyə qədər atacağı addımlar üçün kifayət qədər səbəb olduğunu, lakin dini və mənəvi prinsiplərə sadiqliklərinin bu yolu bağladığını söyləyib.
Araqçi həmçinin, ABŞ ilə danışıqlara yenidən başlamağa hazır olduqlarını və hazırda bunun üçün uyğun zaman olduğunu deyib.
“İran bu müharibədən üstün bir dirənişlə qalib çıxdı. Bayrağı yuxarıda olan qalib heç bir danışıqlardan qorxmaz” – deyə, o qeyd edib.
Onun sözlərinə görə, ABŞ danışıqların yenidən başlaması üçün vasitəçilər vasitəsilə bir neçə dəfə mesaj göndərib. İran bu danışıqların hərbi qarşıdurma ilə nəticələnməyəcəyinə dair zəmanət istəyir və mövcud variantları nəzərdən keçirir.
Araqçi əlavə edib ki, İranın uranı zənginləşdirmək hüququnun tanınmadığı heç bir razılaşmanı qəbul etməyəcəklər. O, bu sahədə İran xalqının hüquqlarına tam hörmət göstərilməsinin vacibliyini vurğulayıb.
Son olaraq, Araqçi bildirib ki, danışıqlar yalnız İranın nüvə proqramının dinc xarakter daşıdığına zəmanət verilməsi və bunun müqabilində sanksiyaların ləğvi üzərində aparılacaq. İranın raket proqramı və hərbi gücü isə heç bir halda müzakirə mövzusu olmayacaq.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.