BAKI, AzerVoice
Tramp İrana müdaxilə qərarını iki həftəyə verəcək.
AzerVoice xəbər verir ki, ABŞ Prezidenti Donald Tramp İrana qarşı mümkün hərbi müdaxilə ilə bağlı son qərarını iki həftə ərzində verəcəyini açıqlayıb.
Prezident, ilkin olaraq diplomatiyaya üstünlük verdiyini bildirərək Pentaqonun təqdim etdiyi hücum planlarını təsdiqləsə də, hələlik əmri verməyib.
Ağ Evin sözçüsü Karolin Leavitt, mətbuat konfransında Trampın qərarını birbaşa özü tərəfindən çatdırdığını bildirib. Onun sözlərinə görə, “Prezident İranın 60 gün ərzində danışıqlara oturmaması fonunda İsrailin hərəkətə keçməsindən sonra vəziyyəti dəyərləndirib və qərarını iki həftəyə verəcək”.
Leavitt eyni zamanda bildirib ki, Tramp diplomatiyaya önəm versə də, zərurət yaranacağı təqdirdə güc tətbiqindən çəkinməyəcək.
ABŞ mətbuatı prezidentin Situasiya otağında Birləşmiş Qərargah Rəisləri Komitəsinin sədri Den Keyn, müdafiə naziri Pit Heqset və digər yüksək rütbəli şəxslərlə məsləhətləşdikdən sonra İrana hücum planlarını təsdiqlədiyini, lakin “zərbə əmri” vermədiyini yazıb.
Wall Street Journal-a reaksiya verən Tramp, “Onlar nə düşündüyümü bilmir. Mən son qərarımı ehtiyac yaranan an verirəm”, – deyə bildirib.
Bloomberg və Axios-un yaydığı məlumatlara əsasən, ABŞ administrasiyası mümkün hücumun İranın nüvə proqramını dayandırmağa kifayət edib-etməyəcəyini və Yaxın Şərqdə uzunmüddətli münaqişəyə səbəb olub-olmayacağını müzakirə edir.
Trampın “Öncə Amerika” şüarını əsas götürən MAGA tərəfdarlarının bir hissəsi onun İrana hərbi müdaxilə etməsini seçki vədlərinə zidd hesab edir, lakin digər tərəf Trampın qərarına hörmətlə yanaşacaqlarını bildirir.
Senator Lindsey Graham kimi respublikaçıların şahin qanadı isə Trampa İrana qarşı sərt mövqe tutması üçün təzyiq göstərir. Siyasi təhlilçilərə görə, bu məsələ Trampın partiya daxilindəki liderliyini möhkəmləndirməsi baxımından ciddi sınaqdır.