BAKI,VOA,Yusif Şərifzadə

Birləşmiş Millətlər Təşkilatının Fələstinli Qaçqınlara Yardım Agentliyi İsrail qüvvələrinin işğal altındakı İordan çayının qərb sahilində yerləşən Qələndiya Təlim Mərkəzinə basqınını qəti şəkildə pisləyib.

VOA xəbər verir ki, agentlik yaydığı bəyanatda İsrail qüvvələrinin Qələndiyadakı təlim mərkəzinə daxil olmasını qəbuledilməz adlandırıb və obyektin beynəlxalq hüquqla qorunduğunu bildirib.

Bəyanatda qeyd olunub ki, Qələndiya Təlim Mərkəzi Birləşmiş Millətlər Təşkilatına məxsus obyekt olduğundan beynəlxalq hüquqla təşkilata verilən toxunulmazlıq və imtiyazlardan yararlanır.

Agentlik vurğulayıb ki, onun obyektlərinin fəaliyyətinə mane olmağa yönəlmiş istənilən addım Birləşmiş Millətlər Təşkilatının üzərinə düşən vəzifələri yerinə yetirmək imkanlarına mənfi təsir göstərir.

Bəyanat İsrail rəsmilərinin Qələndiyadakı obyektin İsrail qüvvələri tərəfindən ələ keçirildiyini bildirən açıqlamalarından sonra yayılıb.

Agentlik Qələndiya Təlim Mərkəzinin İordan çayının qərb sahilinin müxtəlif ərazilərində yaşayan fələstinli qaçqınlara xidmət göstərilməsində mühüm rol oynadığını bildirib.

Birləşmiş Millətlər Təşkilatının Fələstinli Qaçqınlara Yardım Agentliyi beynəlxalq ictimaiyyəti təşkilatın obyektlərinin icazəsiz daxilolma və ələ keçirilmə hallarından qorunmasını təmin etməyə çağırıb.

“Beynəlxalq ictimaiyyət Qələndiya Təlim Mərkəzinin və işğal altındakı Şərqi Qüdsdə yerləşən Birləşmiş Millətlər Təşkilatının bütün digər obyektlərinin toxunulmazlığını qorumaq üçün dərhal və qətiyyətlə hərəkət etməlidir”, – bəyanatda bildirilib.