BAKI,VOA

BMT-nin Uşaq Fondu (UNICEF) Əfqanıstanda təxminən 1 milyon uşağın ağır kəskin qidalanma çatışmazlığı səbəbindən ölüm təhlükəsi ilə üz-üzə olduğunu açıqlayıb.

UNICEF-in Əfqanıstan nümayəndəsi Tacəddin Əyvali bildirib ki, ölkədə 3,7 milyon uşaq kəskin qidalanma çatışmazlığından əziyyət çəkir. Onlardan 1 milyonu həyat üçün təhlükəli ağır vəziyyətdədir.

Ağır qidalanma çatışmazlığı hallarının 83 faizini 2 yaşadək uşaqlar təşkil edir. Altı aydan kiçik körpələr isə bu səbəbdən xəstəxanalara yerləşdirilən uşaqların təxminən 40 faizini təşkil edir.

UNICEF-in məlumatına görə, ilin əvvəlindən Əfqanıstan xəstəxanalarında orta və ağır dərəcəli qidalanma çatışmazlığı olan 500 mindən çox uşaq müalicə alıb. Tibbi fəsadlarla müşayiət olunan ağır hallar 2025-ci ilin iyulundakı 6 mindən 2026-cı ilin iyulunda 8 minə yüksəlib.

Ölkənin cənubundakı bəzi xəstəxanalarda vəziyyət o həddə çatıb ki, ağır qidalanma çatışmazlığından əziyyət çəkən üç-dörd uşaq eyni çarpayıdan istifadə etməli olur.

UNICEF həmçinin bildirir ki, Əfqanıstandakı uşaqların yarısı kəskin qida yoxsulluğu şəraitində yaşayır. Bir çox uşağın gündəlik qidası iki və ya daha az qida qrupundan ibarət olur və bu, onların normal inkişafı üçün zəruri tələbatı qarşılamır.

Quraqlıq, sonradan baş verən güclü yağış və daşqınlar, xəstəliklər və ölkəyə qayıdan milyonlarla insanın yaratdığı əlavə sosial yük böhranı daha da dərinləşdirib. 2023-cü ildən Əfqanıstana təxminən 6 milyon insan qayıdıb və onların yarıdan çoxunu uşaqlar təşkil edir.

Maliyyə çatışmazlığı da vəziyyəti ağırlaşdırır. Bu il ağır qidalanma çatışmazlığının müalicəsi üçün 100-dən çox mərkəz bağlanıb, yüzlərlə digər tibb müəssisəsi isə maliyyələşmədən məhrum olub.

UNICEF Əfqanıstanın qidalanma sektorunda maliyyə ehtiyacının 57 faizinin qarşılanmadığını, təşkilatın isə bu il üçün tələb olunan təxminən 180 milyon dollarlıq vəsaitin yalnız 22 faizini aldığını açıqlayıb.

Təşkilat beynəlxalq ictimaiyyəti uşaqların həyatını xilas etmək üçün təcili, çevik və davamlı maliyyə yardımı göstərməyə çağırıb.