BAKI, AzerVoice

ABŞ prezidenti Donald Trampın süni intellektlə hazırladığı və Qəzzanı dəbdəbəli kurort kimi təsvir edən videosu geniş tənqidlərə səbəb olub.

AzerVoice xəbər verir ki, sosial mediada paylaşılan videoda Qəzza futuristik bir istirahət məkanı kimi təqdim edilir – qızılı Tramp markalı binalar, xurma ağacları və dəbdəbəli əyləncələr. Klipdə həmçinin Trampın nəhəng qızıl heykəli, eləcə də İlon Mask və İsrail baş naziri Benyamin Netanyahunun günəş vannası qəbul edən versiyaları yer alıb.

Tənqidçilər bildirirlər ki, bu video Qəzzanın mövcud humanitar böhranını gözardı edir və ABŞ-ın rəhbərliyi altında həyata keçiriləcək yenidənqurma planını təbliğ edir. Beynəlxalq Böhran Qrupunun eksperti Alessandro Accorsi videonun "Qəzzanı fələstinlilərsiz görən bir daşınmaz əmlak layihəsi kimi" təqdim edildiyini vurğulayıb.

Tramp Qəzzanı “daha yaxşı Monako”ya çevirmək istədiyini və bölgənin yenidən qurulması üçün podratçılarla danışıqlar apardığını bildirib. Ekspertlər isə bunun fələstinlilərin məcburi köçürülməsi anlamına gələ biləcəyini və beynəlxalq hüquqa zidd olduğunu qeyd edirlər.

Bölgədə müharibənin səbəb olduğu ağır humanitar fəlakət – minlərlə insanın ölümü, aclıq və infrastrukturun dağıdılması fonunda bu video laqeydlik nümunəsi kimi dəyərləndirilib. İnsan haqları təşkilatları və fələstinli liderlər də Qəzzanın "boş bir lövhə" kimi təqdim olunmasını pisləyib və bunun tarixi reallığı təhrif etdiyini bildiriblər.