Bakı, AzerVoice

ABŞ prezidenti Donald Tramp Rusiya prezidenti Vladimir Putin ilə Ukrayna müharibəsinin dayandırılması və ABŞ-Rusiya arasında geniş iqtisadi əməkdaşlıq barədə ciddi danışıqlar apardığını açıqlayıb.

AzerVoice xəbər verir ki , Tramp bu barədə Truth Social platformasında yazıb.

Bu açıqlama , Fransa prezidenti Emmanuel Makronun Ağ Evdə G7 liderləri ilə konfransa qatıldığı bir vaxtda verilib.

Tramp bildirib ki, o, digər G7 liderləri ilə ABŞ-ın dəstəyi müqabilində Ukraynanın öz təbii ehtiyatlarına çıxış imkanı verəcək yeni bir saziş imzalamaq istəyini müzakirə edib.

"Mən minerallar və nadir torpaqlar üzrə ABŞ və Ukrayna arasında tezliklə imzalanacağını gözlədiyimiz mühüm bir sazişi vurğuladım."

Tramp qeyd edib ki, bu iqtisadi tərəfdaşlıq Ukraynaya göndərilən on milyardlarla dollarlıq hərbi yardımın bir hissəsini geri qaytarmağa və Ukrayna iqtisadiyyatının böyüməsinə kömək etməyə imkan verəcək.

Ukraynada sülhü bərpa etməyin vaxtıdır - Tramp

Xatırladaq ki, Trampın bu açıqlamaları Avropa liderlərinin narahatlığı fonunda verilib. O, prezidentliyə başladıqdan sonra ABŞ-ın xarici siyasətində kəskin dəyişikliklər etməyə çalışır.

Son üç il ərzində ABŞ və Avropa ölkələri Rusiyanın Ukraynaya təcavüzünə qarşı birgə mübarizə aparıb və Ukraynaya geniş dəstək verib. Lakin Tramp Moskva ilə birbaşa danışıqlara gedərək müharibəni dayandırmaq üçün yeni razılıq əldə etməyə çalışır. Bununla belə, o, Ukrayna və Avropa ölkələrinin bu sazişdə hansı rol oynayacağını hələ açıqlamayıb.