BAKI,VOA,Yusif Şərifzadə

Bəhreyn məhkəməsi İran İslam İnqilabı Keşikçiləri Korpusu (SEPAH) üçün casusluqda ittiham olunan üç nəfəri ömürlük həbs cəzasına məhkum edib.

VOA xəbər verir ki, Bəhreyn hakimiyyəti üç şəxsin İranın İslam İnqilabı Keşikçiləri Korpusu və onun üzvləri ilə əməkdaşlıq edərək ölkəyə qarşı düşmənçilik və terror fəaliyyətlərinə kömək etməkdə təqsirləndirildiyini açıqlayıb.

Bəhreyn Prokurorluğunun məlumatına görə, təqsirləndirilən şəxslər İran qurumu ilə əlaqə qurmaqda və ölkənin maraqlarına zərər vurmağa yönəlmiş fəaliyyətlərdə iştirak etməkdə ittiham olunublar.

Bəyanatda bildirilib ki, məhkəmənin qərarı nəticəsində üç təqsirləndirilən şəxs barəsində ömürlük həbs hökmü çıxarılıb.

İran və ABŞ arasında müharibənin başlamasından sonra Körfəz ölkələri Tehranın hücumlarının hədəfində olduqlarını bildirərək, İranla əlaqəli olduğu iddia edilən qruplara qarşı tədbirləri gücləndiriblər.

Bəhreyn hakimiyyəti də İran rəhbərliyinə dəstək ifadə edən şəxslərlə bağlı nəzarəti artırıb.

Körfəz ölkələri İranla bağlı təhlükəsizlik məsələlərini regional sabitlik üçün əsas çağırışlardan biri kimi qiymətləndirirlər.