BAKI,VOA,Yusif Şərifzadə

Livanın Baş naziri Nəvaf Salam İran və ABŞ arasında əldə olunan atəşkəs razılaşmasından sonra ölkəsinin İsrail qüvvələrinin Livan ərazilərindən tam çıxarılması istiqamətində səylərini gücləndirəcəyini bildirib.

VOA xəbər verir ki, Nəvaf Salam yaydığı bəyanatda Livanın bütün əraziləri üzərində tam nəzarətin təmin olunması və saxlanılan şəxslərin azadlığa buraxılması üçün fəaliyyətin genişləndiriləcəyini deyib.

Baş nazir əldə olunan razılaşmanın müharibənin dayandırılmasına xidmət edəcəyinə ümid etdiyini vurğulayıb.

Onun sözlərinə görə, bu proses insanların həlak olmasının, dağıntıların, məcburi köçkünlüyün və Livan xalqının üzləşdiyi ağır humanitar nəticələrin sona çatmasına kömək edə bilər.

Salam razılaşmanın əldə olunmasına töhfə verən bütün tərəflərə təşəkkürünü ifadə edib.

O bildirib ki, Livan vətəndaşlarının təhlükəsiz və ləyaqətli şəkildə öz şəhər və kəndlərinə qayıtması hökumətin əsas prioritetlərindən biridir.

Baş nazir qeyd edib ki, bu məqsədlə beynəlxalq tərəfdaşlarla əməkdaşlıq daha da gücləndiriləcək.

Nəvaf Salam əlavə edib ki, yenidənqurma işlərinin həyata keçirilməsi üçün zəruri şəraitin yaradılması istiqamətində də səylər artırılacaq.