BAKI,AzerVoice, Fərid Mikayılov

Fələstin rəhbərliyi ABŞ Prezidenti Donald Trampın təqdim etdiyi “Qəzza Münaqişəsini Sonlandıracaq Genişmiqyaslı Plan”ı müsbət qarşılayıb.

AzerVoice xəbər verir ki, bölgədə ədalətli sülhün bərqərar olması üçün ABŞ, region ölkələri və beynəlxalq tərəfdaşlarla əməkdaşlığa hazır olduğunu bəyan edib.

Fələstin Dövlət Prezidentliyinin yazılı açıqlamasında bildirilib ki, Trampın Qəzzadakı müharibənin dayandırılması istiqamətində göstərdiyi təşəbbüs məmnuniyyətlə qarşılanır.

“Fələstin rəhbərliyi ABŞ Prezidentinin sülhə aparan bir yol tapacağına inanır və müharibənin sonlanması üçün konstruktiv əməkdaşlığa hazırdır” — deyə açıqlamada qeyd olunub.

Bəyanata görə, Qəzza ilə bağlı əldə ediləcək razılaşma torpaq ilhaqını və fələstinlilərin məcburi köçürülməsini önləməli, beynəlxalq hüquqa zidd birtərəfli addımlara son qoymalı, İsrailin Qəzzadan tamamilə çəkilməsini təmin etməlidir. Bununla yanaşı, Qəzza zolağı, Şərqi Qüds və İordan çayının qərb sahilindəki ərazilərin vahid idarəetmə altında birləşdirilməsinin vacibliyi vurğulanıb.

Xatırladaq ki, Ağ Ev Trampın hazırladığı 20 maddəlik planı elan edib. ABŞ Prezidenti planın qəbul olunacağı halda müharibənin dərhal dayandırılacağını, İsrailin Qəzzadan mərhələli şəkildə geri çəkiləcəyini, HƏMAS-ın prosesdə rol almayacağını və bütün əsirlərin azad ediləcəyini bəyan edib.