BAKI, AzerVoice, Səməd Əyyubov
Fələstin rəhbərliyi bəyan edib ki, İsrailin işğal altındakı İordan çayının qərb sahilini ilhaq planı bölgədə və dünyada sabitlik və təhlükəsizliyin təmin edilməsinə mane olacaq.
AzerVoice xəbər verir ki, məsələ ilə bağlı Fələstin Prezident Administrasiyasının sözçüsü Nəbil Əbu Rudeinə açıqlama verib.
Əbu Rudeinə vurğulayıb ki, məskunlaşma siyasəti kimi ilhaq planlarının heç bir legitimliyi yoxdur və bu addımlar beynəlxalq ictimaiyyət tərəfindən dəfələrlə qınanıb və rədd edilib:
“Belə addımlar bölgədə və dünyada sabitliyin və təhlükəsizliyin təmin olunmasının qarşısını alacaq.”
Onun sözlərinə görə, İordan çayının qərb sahilini ilhaq etmək və İsrailin suverenlik tətbiq etməyə cəhdləri beynəlxalq hüququn və BMT qətnamələrinin pozulmasıdır. Xüsusilə də BMT Təhlükəsizlik Şurasının 242 (1967), 338 (1973) və 2334 (2016) saylı qətnamələri bu cür hərəkətləri etibarsız elan edir və işğalın legitimləşdirilməsinə yol vermir.
Əbu Rudeinə əlavə edib ki, İsrail hökuməti atdığı addımlarla Qəzzadakı müharibəni dayandırmaq, İordan çayının qərb sahilində zorakılığı azaltmaq və iki dövlətli həll yolunu təmin etmək imkanlarını qəsdən məhdudlaşdırır. O, beynəlxalq ictimaiyyəti İsrailin bu planlarının qarşısını almaq üçün ciddi və praktik addımlar atmağa, Fələstin dövlətini tanımağa və 1967-ci il sərhədləri çərçivəsində paytaxtı Şərqi Qüds olan müstəqil dövlətin qurulmasına dəstək verməyə çağırıb.
Fələstin Prezident Administrasiyasının sözçüsü bir daha vurğulayıb ki, İsrailin Şərqi Qüds də daxil olmaqla işğal altındakı Fələstin torpaqları üzərində heç bir suverenliyi yoxdur. Onun sözlərinə görə, İsrailin işğalı və məskunlaşma fəaliyyəti beynəlxalq hüquqa ziddir və buna dərhal son qoyulmalıdır. O, ABŞ-ı da İsrailin məsuliyyətsiz və təhlükəli siyasətinə dəstək verməməyə çağırıb.
Qeyd edək ki, İsrailin xarici işlər naziri Gideon Saar ABŞ-ın dövlət katibi Marko Rubio ilə görüşündə Tel-Əviv rəhbərliyinin yaxın aylarda İordan çayının qərb sahilini ilhaq etməyə hazırlaşdığını bildirib.