BAKI, AzerVoice
ABŞ administrasiyası, Yaxın Şərqdə artan regional gərginliklər fonunda bəzi diplomatik nümayəndəliklərdən və hərbi bazalardan qeyri-zəruri personal və hərbçi ailələrinin təxliyəsinə başlayıb.
AzerVoice xəbər verir ki, bu addım həm ABŞ Dövlət Departamenti, həm də Müdafiə Nazirliyi tərəfindən təsdiqlənib.
ABŞ Prezidenti Donald Tramp çərşənbə günü mətbuata verdiyi açıqlamada bu təxliyələrin təhlükəsizlik məqsədi ilə həyata keçirildiyini bildirib
“Onları oradan çıxarırıq, çünki orası təhlükəli bir yer ola bilər” – deyə Tramp vurğulayıb.
Gərginliyin əsas səbəbi tam olaraq açıqlanmasa da, ABŞ Mərkəzi Komandanlığı (CENTCOM) rəsmiləri Yaxın Şərqdəki risklərin yüksəldiyini və bu prosesi yaxından izlədiklərini qeyd edir.
Müdafiə naziri Pit Heqset müxtəlif hərbi bazalardan ailələrin könüllü təxliyyəsinə icazə verib. Rəsmi şəxslər bildirir ki, ABŞ-ın bu addımı hərbçilərin və onların ailələrinin təhlükəsizliyini təmin etmək məqsədi daşıyır.
CENTCOM-un rəhbəri general Maykl Kurilla bölgədəki gərginliyin artması səbəbindən Senatda planlaşdırılmış çıxışını təxirə salıb.
ABŞ Dövlət Departamenti tərəfindən verilən açıqlamaya əsasən, İraq, Bəhreyn və Küveytdəki səfirliklər, eləcə də Erbildəki konsulluqdan qeyri-zəruri personal geri çağırılır. Lakin İraq rəsmiləri bu qərarın ölkədəki daxili təhlükəsizliklə birbaşa əlaqəsi olmadığını bildiriblər.
Tramp, verdiyi müsahibədə İranla nüvə razılaşmasına dair ümidlərinin gündən-günə azaldığını bildirib.
“Hər keçən gün bu məsələ ilə bağlı daha az ümidli oluram. Sanki ləngidirlər və bu, məni kədərləndirir”- deyə o bildirib.