BAKI,VOA,Yusif Şərifzadə

İran Hörmüz boğazına nəzarət məsələsində mövqeyini qoruyacağını açıqlayıb. Tehran bildirib ki, bu strateji su yolunun təhlükəsizliyinin təmin edilməsində əsas rol oynayan tərəf olaraq qalacaq.

VOA xəbər verir ki, İranın xarici işlər naziri Abbas Əraqçi ölkəsinin “həmişə Hörmüz boğazının qoruyucusu olduğunu və bundan sonra da belə qalacağını” bildirib.

Abbas Əraqçi bu açıqlamanı ABŞ Prezidenti Donald Trampın Hörmüz boğazından keçən gəmilərə ödəniş tətbiq ediləcəyi ilə bağlı bəyanatından sonra verib.

İran xarici işlər naziri sosial şəbəkədəki paylaşımında bildirib ki, kommersiya gəmilərinin boğazdan təhlükəsiz keçidini təmin edən tərəf bu xidmətə görə kompensasiya almalıdır.

Əraqçi qeyd edib ki, ABŞ Prezidenti bu məsələdə haqlıdır, lakin keçid üçün nəzərdə tutulan 20 faizlik ödənişin çox yüksək olduğunu vurğulayıb. O bildirib ki, İran daha ədalətli yanaşma tərəfdarıdır.

Hörmüz boğazı dünya enerji daşımalarının əsas marşrutlarından biri hesab olunur. Burada nəzarət və keçid ödənişləri ilə bağlı yaranan mübahisələr beynəlxalq ticarət və enerji bazarlarında narahatlıq yaradıb.

Beynəlxalq Dəniz Təşkilatı isə daha əvvəl beynəlxalq gəmiçilik üçün istifadə olunan boğazlarda məcburi rüsumların tətbiqinə qarşı olduğunu açıqlayıb.