BAKI,VOA,Yusif Şərifzadə

ABŞ və İran arasında aparılan danışıqlarda müəyyən irəliləyiş əldə olunduğu bildirilir. Bununla yanaşı, Tehran tərəfi mümkün razılaşma ilə bağlı ehtiyatlı mövqeyini davam etdirir.

VOA xəbər verir ki, Vaşinqton və Tehran arasında aparılan müzakirələrdə son günlər müəyyən yaxınlaşmanın müşahidə olunduğu bildirilir. Məlumatlara görə, İranın əsas tələblərindən biri Hörmüz boğazında tətbiq olunan məhdudiyyətlərin və blokadanın aradan qaldırılması olub.

İran rəsmiləri daha əvvəl boğazda tətbiq edilən məhdudiyyətləri “dəniz quldurluğu aktı” kimi qiymətləndirmişdilər. Müzakirə olunan mümkün anlaşma çərçivəsində isə Hörmüz boğazında gəmiçilik fəaliyyətinin bərpası və nəqliyyat axınının normallaşdırılması nəzərdə tutulur.

Lakin əldə olunan irəliləyişlərə baxmayaraq, İran rəhbərliyi danışıqlar prosesinə ehtiyatla yanaşır. İran parlamentinin sədri və əsas danışıqlar fiqurlarından biri olan Məhəmməd Baqir Qalibaf bir neçə saat əvvəl verdiyi açıqlamada qarşı tərəfin vədlərinə etibar etmədiklərini bildirib.

Onun sözlərinə görə, Tehran üçün əsas meyar bəyanatlar deyil, əməli addımlardır və İran yalnız konkret nəticələr əsasında qərar verəcək.

Müşahidəçilər qeyd edirlər ki, son günlər İran rəsmilərinin çıxışlarında “güzəşt” anlayışından daha çox “çəkindirici güc”, “müqavimət” və “möhkəmlik” mesajları ön plana çıxır. Bu isə Tehranın mümkün razılaşmanı zəiflik əlaməti kimi deyil, güc balansının nəticəsi kimi təqdim etməyə çalışdığını göstərir.

Danışıqların yekun nəticəsi ilə bağlı hələ rəsmi qərar açıqlanmasa da, tərəflərin qarşıdakı günlərdə daha intensiv diplomatik təmaslar aparacağı gözlənilir.