BAKI,VOA

ABŞ Prezidenti Donald Tramp İranla münasibətlər və regiondakı son hərbi-strateji vəziyyət barədə sensasiyalı açıqlamalar verib. Tramp Ağ Evdə jurnalistlərə verdiyi bəyanatda Tehranın hələ də Vaşinqtonun tələblərinə cavab vermədiyini və ABŞ-ın geri çəkilmək niyyətində olmadığını vurğulayıb.

"İran hələ də istədiyimiz razılaşmanı təqdim etməyib"

Prezident Tramp qeyd edib ki, Tehran administrasiyası indiyə qədər ABŞ-ın israr etdiyi şərtlərə uyğun bir razılaşma masasına gəlməyib. O, ABŞ-ın bölgədəki hərbi varlığının davam edəcəyini bildirərək deyib ki, : "Biz bölgədən erkən çıxmayacağıq və ya geri çəkilməyəcəyik. Hədəfimiz İrandakı missiyamızı tam, düzgün və yekun şəkildə yerinə yetirməkdir".

Hörmüz boğazında 400 tankerlik neft tıxacı

Bəyanatın ən diqqətçəkən məqamı Hörmüz boğazındakı dəniz blokadası ilə bağlı olub. Trampın sözlərinə görə, hazırda boğazda İranın neftini daşıyan təxminən 400-ə yaxın tanker saxlanılıb. Bu gəmilərin göyərtəsində nəhəng miqdarda neft ehtiyatı olduğunu bildirən prezident, bu ehtiyatların dünya bazarına buraxılmasının yanacaq qiymətlərində inqilabi bir enişə səbəb olacağını vəd edib: "Bu ehtiyatların sərbəst buraxılması yanacaq qiymətlərində görünməmiş bir azalma ilə nəticələnəcək".

"İran dünyanı şantaj etməyə çalışıb"

Donald Tramp İranın illərdir Hörmüz boğazından bir təzyiq rıçağı kimi istifadə etdiyini vurğulayaraq Tehranı sərt ittiham edib: "İranlılar illər boyu Hörmüz boğazını bağlamaq hədəsi ilə həm ölkəmizi, həm də bütün dünyanı şantaj etməyə cəhd göstəriblər".

Ekspertlər hesab edirlər ki, Trampın bu bəyanatı həm İrana qarşı diplomatik təzyiqin artırılması, həm də ABŞ-ın daxili bazarında enerji qiymətlərini aşağı salmaq üçün strateji gediş xarakteri daşıyır.