BAKI,VOA Nailə Babazadə

İranın paytaxtı Tehranda ölkənin yeni rəhbəri Müctəba Xameneiyə sədaqət və bağlılıq nümayiş etdirmək məqsədilə on minlərlə insanın iştirakı ilə izdihamlı yürüş keçirilib.

VOA xəbər verir ki, tədbir şəhərin mərkəzi nöqtələrindən biri olan İmam Hüseyn meydanından başlayaraq tarixi Azadi meydanına qədər davam edib. Əllərində dövlət bayraqları daşıyan iştirakçılar Müctəba Xameneinin liderliyini dəstəkləyən şüarlar səsləndiriblər. Yürüş həm də kəskin siyasi mesajlarla müşayiət olunub; belə ki, kütlə ABŞ və İsrail əleyhinə şüarlar atıb, ABŞ Prezidenti Donald Trampın karikaturalarının əks olunduğu dövizlər nümayiş etdiriblər.

Tədbirin keçirildiyi ərazidə nümayiş etdirilən raket maketləri və İmam Hüseyn meydanında qurulan səhnədə hərbi geyimli uşaqların ifa etdiyi marşlar yürüşün hərbi-vətənpərvərlik ruhunu ön plana çıxarıb. Yeni liderə bağlılıq andı ilə yanaşı, yürüş iştirakçıları eyni zamanda İmam Rzanın doğum ildönümünü də qeyd edərək siyasi aksiyaya dini mahiyyət qazandırıblar. Bu genişmiqyaslı nümayiş İranın daxili siyasi keçid dövründə yeni rəhbərliyin xalq dəstəyini nümayiş etdirmək baxımından strateji əhəmiyyət kəsb edir.