BAKI,VOA Nailə Babazadə

İran bağlantılı "Handala" haker qrupu Bəsrə körfəzi bölgəsində xidmət edən 2 min 379 ABŞ dəniz piyadasına məxsus məxfi kimlik məlumatlarını ələ keçirərək paylaşdığını iddia edib.

VOA xəbər verir ki, Hakerlər tərəfindən yayımlanan bəyanatda ABŞ komandirlərinin təhlükəsizlik barədəki açıqlamalarının bir "yanılsama" olduğu vurğulanıb. Qrup iddia edir ki, əllərindəki məlumatlar yalnız hərbçilərin ad və soyadları ilə məhdudlaşmır; buraya əsgərlərin ailə üzvləri, ev ünvanları, xidmət etdikləri bazalar, gündəlik hərəkət marşrutları, alış-veriş vərdişləri və hətta asudə vaxtlarını necə keçirdiklərinə dair detallı informasiyalar daxildir.

Haker qrupu hazırda əllərində olan geniş siyahının yalnız kiçik bir hissəsini ictimaiyyətə təqdim etdiklərini, zərurət yaranacağı təqdirdə yaxın günlərdə on minlərlə ABŞ hərbçisinə aid qalan məlumatları da yayımlayacaqlarını bildiriblər. Bu hadisə bölgədəki ABŞ hərbi personalının fərdi təhlükəsizliyi və kiber-müdafiə sistemlərinin etibarlılığı ilə bağlı ciddi narahatlıqlara səbəb olub.