BAKI,VOA,Yusif Şərifzadə

İran İslam İnqilab Keşikçiləri Korpusu ABŞ prezidenti Donald Trampın korpus nümayəndələri ilə gizli əlaqə kanalı vasitəsilə danışıqlar aparıldığı barədə iddiasını rədd edib.

VOA xəbər verir ki, korpusun sözçüsü, briqada generalı Hüseyn Məhəmmədi dövlətə məxsus Təsnim xəbər agentliyinə açıqlamasında amerikalılarla heç bir danışıqlar aparılmadığını bildirib.

“İnqilab Keşikçiləri Korpusunun rəsmiləri ilə amerikalılar arasında heç bir danışıq yoxdur”, – deyə Məhəmmədi bildirib.

O, Trampın açıqlamasını yalan adlandıraraq ABŞ prezidentinin müharibədə məğlubiyyət və ümidsizlikdən qaynaqlanan xəyallar içində olduğunu iddia edib.

Məhəmmədi bildirib ki, İnqilab Keşikçiləri Korpusu İran xalqının və İslam Respublikasının gücünün əsas dayaqlarından biridir və ölkənin mövqeyini döyüş meydanında ifadə edir.

İranlı general hazırda ABŞ tərəfi ilə bu istiqamətdə də heç bir danışıqların aparılmadığını vurğulayıb.

Onun sözlərinə görə, bunun əsas səbəblərindən biri ABŞ-ın verdiyi vədləri yerinə yetirməməsi və əvvəlki razılaşmaları dəfələrlə pozmasıdır.

Tramp isə daha əvvəl ABŞ administrasiyasının İran İslam İnqilab Keşikçiləri Korpusu ilə birbaşa gizli əlaqə kanalı yaratdığını bildirmişdi. Bu iddia İran tərəfinin son açıqlaması ilə açıq şəkildə ziddiyyət təşkil edir.