BAKI, VOA, Fərid Mikayılov

İran Prezidenti Məsud Pezeşkian ABŞ və İsraillə müharibədən sonra ölkənin iqtisadi vəziyyətinin əvvəlki dövrlə müqayisədə daha da ağırlaşdığını bildirib.

VOA xəbər verir ki, Pezeşkian bu barədə keçirilən toplantıda çıxışı zamanı deyib.

İran Prezidenti qeyd edib ki, idxal olunan məhsulların ölkəyə çatdırılması üçün daha uzun və mürəkkəb marşrutlardan istifadə olunması onların son qiymətinin artmasına səbəb olur.

Pezeşkian dövlət gəlirlərinin də əhəmiyyətli dərəcədə azaldığını vurğulayıb.

“Gəlirlərimiz də azalıb. Əvvəllər neft satırdıq, indi sata bilmirik”, – deyə o bildirib.

İran Prezidenti ölkədəki sənaye müəssisələrinin zərər görməsinin də iqtisadi vəziyyətə mənfi təsir etdiyini qeyd edib. Onun sözlərinə görə, bir sıra fabriklərə ziyan dəyib və bu, dövlətin vergi gəlirlərinin azalmasına səbəb olub.

“Fabrikalardan vergi də toplaya bilmirik. Üstəlik, onların fəaliyyətini davam etdirə bilməsi üçün özümüz onlara vəsait ayırmalı oluruq”, – deyə Pezeşkian bildirib.

İran Prezidenti ölkədəki iqtisadi vəziyyəti xarakterizə edərkən “Problemimiz dəfələrlə artıb, gəlirlərimiz isə azalıb” deyib.