BAKI,VOA,Yusif Şərifzadə

İranın Ali Məhkəmə rəhbəri Qulam-Hüseyn Möhsüni Ejei ölkənin “hibrid müharibədə düşmənin planlarına” qarşı ayıq-sayıq olmalı olduğunu bildirib.

VOA xəbər verir ki, Ejei qələbənin əsas şərtinin birlik və ali rəhbərin göstərişlərinə əməl etmək olduğunu deyib.

O bildirib ki, İran “hibrid müharibə” şəraitində düşmənin planlarına qarşı heç bir halda arxayınlaşmamalıdır.

Ejeinin sözlərinə görə, İran İslam Respublikasının ABŞ üzərində qələbəsindən sonra ABŞ-la müttəfiq ölkələrin rəhbərlərinin İranın gücü ilə bağlı təsəvvürləri və baxışları dəyişib.

İran rəsmisi bu dəyişikliklərin ölkənin hərbi və siyasi imkanlarının rəqiblər tərəfindən yenidən qiymətləndirilməsi ilə əlaqəli olduğunu bildirib.

O, İran cəmiyyətində birlik və ali rəhbərin mövqeyinə bağlılığın ölkənin qarşılaşdığı təhdidlərə qarşı əsas amillərdən biri olduğunu vurğulayıb.

Ejei həmçinin “hibrid müharibə”nin yalnız hərbi əməliyyatlarla məhdudlaşmadığını və müxtəlif sahələrdə təzyiq və təsir cəhdlərini əhatə etdiyini qeyd edib.