BAKI,VOA

İranın keçmiş xarici işlər naziri Cavad Zərif ölkəsini "qələbə elan etməyə və həm bu münaqişəni bitirən, həm də növbətisinin qarşısını alan bir sövdələşməyə" çağırıb.

VOA xəbər verir ki, Zərif bu barədə ABŞ-ın nüfuzlu "Foreign Affairs" jurnalında dərc olunan geniş məqaləsində yazıb.

Uzun illər İranın nüvə proqramı üzrə ABŞ və digər dövlətlərlə apardığı danışıqların əsas siması olan Zərif, Tehran üçün əlverişli şərtlərlə ABŞ və İsrail ilə müharibəni dayandırmağın yollarını cızan bir "yol xəritəsi" təqdim edib.

“İran bütün sanksiyaların ləğvi müqabilində nüvə proqramına məhdudiyyətlər qoymağı və Hörmüz boğazını yenidən açmağı təklif etməlidir”-deyə o bildirib.

Zərif hesab edir ki, Vaşinqton əvvəllər qəbul etmədiyi bu razılaşmaya indiki şəraitdə razı ola bilər.

“Tehran ABŞ ilə hər iki ölkənin gələcəkdə bir-birinə zərbə endirməyəcəyinə dair öhdəlik götürdüyü qarşılıqlı hücum etməmə paktını imzalamağa hazır olmalıdır. İran ABŞ ilə həm Amerika, həm də İran xalqı üçün qazanc gətirəcək iqtisadi əlaqələr təklif edə bilər”-deyə Zərif məqaləsində qeyd edib.

Cavad Zərif vurğulayır ki, bütün bu nəticələr İran rəsmilərinə ölkəni xarici düşmənlərdən qorumaq yerinə, diqqəti daha çox daxili sosial rifahın yaxşılaşdırılmasına yönəltməyə imkan verəcək. Onun sözlərinə görə, Tehran bu yolla iranlıların layiq olduğu "yeni və parlaq gələcəyi" təmin edə bilər.