BAKI,VOA

ABŞ Prezidenti Donald Tramp bu gün verdiyi sərt bəyanatda İranın enerji infrastrukturunu tamamilə darmadağın etməklə hədələyib. Tramp Hörmüz boğazının 48 saat ərzində beynəlxalq naviqasiya üçün tam açılmayacağı təqdirdə, ABŞ-ın İranın ən böyük elektrik və enerji stansiyalarına sarsıdıcı zərbələr endirəcəyini bildirib.

VOA xəbər verir ki, prezident Tramp özünün "Truth Social" platformasındakı hesabı vasitəsilə rəsmi Tehrana ultimatum göndərib. O vurğulayıb ki, ABŞ həyati əhəmiyyətli su yoluna yönəlmiş təhdidlər davam edərsə, İranın bütün enerji obyektlərini hədəf almağa hazırdır.

"Əgər İran Hörmüz boğazını indidən etibarən 48 saat ərzində heç bir təhdid olmadan tam açmasa, Amerika Birləşmiş Ştatları onun müxtəlif enerji stansiyalarını, ən böyüyündən başlayaraq vuracaq və məhv edəcək," – deyə Tramp qeyd edib.

İranın "Xatəm əl-Ənbiya" hərbi qərargahı Trampın təhdidlərinə dərhal reaksiya verib. Tehrandan verilən açıqlamada bildirilib ki, İranın enerji infrastrukturuna ediləcək hər hansı hücuma cavab olaraq ABŞ və İsrailin enerji və texnologiya mərkəzləri hədəf alınacaq.

Müharibə meydanında "ağır gecə"

Bölgədəki hərbi vəziyyət barədə ziddiyyətli məlumatlar yayılır. Tramp İranın hava və dəniz qüvvələrinin, həmçinin rəhbərliyinin planlaşdırılan vaxtdan tez məhv edildiyini iddia etsə də, İsrailin Baş naziri Benyamin Netanyahu vəziyyətin "kritik və taleyüklü" olduğunu vurğulayıb. İsrail ordusu (SAXAL) Baş qərargah rəisinin bütün cəbhələrdə genişmiqyaslı hücum əmri verdiyini təsdiqləyib.

Tramp "Truth Social" hesabında İranın artıq xəritədən silindiyini və heç bir müdafiə qabiliyyətinin qalmadığını iddia edib.

Tramp həmçinin "New York Times" qəzetini və onun müxbiri Devid Sangeri hərbi uğurlara şübhə etdikləri üçün kəskin tənqid edərək onları "uğursuz" adlandırıb.

Xatırladaq ki, bu gərginlik İranın İsrailin cənubundakı Dimona və Arad bölgələrinə hücumlarından və Vaşinqtonun Nətənz nüvə obyektini vurması barədə məlumatlardan sonra pik həddə çatıb.