BAKI, AzerVoice
Prezident İlham Əliyev Səudiyyə Ərəbistanının “Əl-Ərəbiyyə” telekanalına verdiyi müsahibədə olduqca önəmli və həssas məsələlərə toxunub. Bunlar arasında Azərbaycanın Yaxın Şərq siyasəti, bu regiona yönəlmiş gələcək planları və strateji hədəfləri xüsusi yer tutur. Bu gün Azərbaycan Yaxın Şərq siyasətində sözün əsl mənasında səmərəli nəticələr əldə etməkdədir. Dövlətimizin başçısı müsahibəsində qonşu ölkələrə və beynəlxalq siyasi aktorlara mühüm mesajlar verib. Otuz il ərzində müharibə və işğaldan əziyyət çəkmiş Azərbaycan bir daha ölkələrin suverenliyinə və ərazi bütövlüyünə necə həssas yanaşdığını nümayiş etdirib. Prezident İlham Əliyevin Suriyanın ərazi bütövlüyü ilə bağlı fikirləri də bunun əyani təzahürüdür. Bu gün baş verən hadisələr və mövcud siyasi reallıqları nəzərə alsaq, tam əminliklə deyə bilərik ki, Azərbaycan İsrail və İslam dünyası arasında yeganə körpü rolunu oynayır və yaşanan problemlərin həllində real vasitəçilik missiyasını həyata keçirir.
AzerVoice xəbər verir ki, bu sözləri AZƏRTAC-a açıqlamasında Yaxın Şərq üzrə ekspert Rufiz Hafizoğlu söyləyib.
O qeyd edib ki, Azərbaycanın Yaxın Şərqdəki müsbət rolu regionun ciddi oyunçuları olan Türkiyə, Səudiyyə Ərəbistanı, Misir və Qətər qədər yüksək qiymətləndirilir. Azərbaycan artıq Suriya-İsrail və Türkiyə-İsrail münasibətlərində vasitəçilik missiyasını uğurla həyata keçirir və ehtiyac yaranarsa, İsrail-Fələstin danışıqlarında da aktiv rol oynaya bilər. Bu missiyanın reallaşması barədə danışmaq hələ erkən olsa da, Azərbaycanın həm İsrail, həm Fələstin, həm də İslam Əməkdaşlıq Təşkilatı daxilindəki rolu və nüfuzu nəzərə alınaraq, bu potensialın mümkün olduğu vurğulanır.
“Azərbaycanın müasir dövrdə Yaxın Şərqə və ümumiyyətlə, Ərəb dünyasına yönəlmiş unikal bir enerji siyasəti mövcuddur. Bu siyasəti əvəzsiz edən əsas amil rəsmi Bakının enerji resurslarını heç vaxt təzyiq vasitəsi kimi istifadə etməməsidir. Azərbaycanın bütün enerji resursları və layihələri yalnız və yalnız bölgənin rifahı, inkişafı və xalqların firavanlığına yönəlib. Tam əminliklə deyə bilərəm ki, Azərbaycanın Ərəb dünyasına yönəlik enerji siyasəti yalnız Suriya ilə məhdudlaşmayacaq. Yeni enerji bazarlarının araşdırılması və fəth edilməsi Azərbaycanın enerji siyasətinin prioritetləri sırasındadır. Yaxın Şərq siyasətimiz bundan sonra da çoxşaxəli inkişaf edəcək. Heç şübhəsiz ki, bu, Azərbaycanın ən ciddi uğurlarından biridir. Bir çoxları hesab edir ki, ölkədə enerji resurslarının mövcudluğu stabilliyi təmin edən əsas amildir, lakin unutmamaq lazımdır ki, enerji resursları həmişə stabillik üçün yetərli vasitə deyil. Burada lider faktoru xüsusi önəm daşıyır və Azərbaycan Prezidenti İlham Əliyev bunu bütün dünyaya nümayiş etdirib”, - deyə ekspert vurğulayıb.