Yaponiya Müdafiə Nazirliyi son büdcə sənədində reaktiv mühərrikli (ramjet) "ASM-3 Kai" raketini həm gəmi əleyhinə, həm də "hava-hava" tipli hədəfləri vurmaq üçün ikili təyinatlı raket kimi istifadə etməyi planlaşdırdığını açıqlayıb. Sakit okeanda daha uzaqmənzilli zərbə imkanları axtarışında olan Tokio yeni hazırlanacaq "ASM-3 Kai" modelinə hava hədəflərini məhv etmə qabiliyyəti əlavə etmək qərarına gəlib.
Yaponiyanın arsenalındakı mövcud görmə dairəsindən kənar (BVRAAM) "hava-hava" raketləri - yerli istehsal olan "AAM-4B" və ABŞ-dən tədarük edilən "AIM-120" - Çinin ən son "PL-15" və "PL-17" tipli raketləri ilə müqayisədə mənzil baxımından məhdud qalır. ABŞ-dən yeni "AIM-260" və "AIM-424" raketlərinin alınması ehtimalı mövcud olsa da, bu sistemlərin genişmiqyaslı ixracına hələ başlanılmayıb.
Reaktiv mühərriklə təchiz olunmuş "ASM-3" 3 Maxdan yuxarı sürət yığmaq qabiliyyətinə malikdir. Raketin hazırkı "ASM-3A" modifikasiyası 400 km uçuş mənzilinə sahib olduğu halda, hazırlanmaqda olan "ASM-3 Kai" versiyasının mənzilinin 1000 km-ə çatdırılması planlaşdırılır.
Yaponiyanın "ASM-3 Kai" raketlərindən xüsusilə bombardmançılar, erkən xəbərdarlıq və nəzarət təyyarələri (AWACS) və havada yanacaqdoldurma tankerləri kimi strateji hava hədəflərinə qarşı istifadə edəcəyi ehtimal olunur. Avropa da analoji istiqamət götürərək MBDA şirkətinin supersəs "STRATUS RS" qanadlı raketini əsas gəmi əleyhinə roluna əlavə olaraq "anti-AWACS" raketi kimi də formalaşdırır.