BAKI,VOA
Səudiyyə Ərəbistanında ərəb dilinin öyrənilməsini təşviq etmək məqsədilə 50-dən çox interaktiv oyunun yer aldığı rəqəmsal platforma istifadəyə verilib.
Kral Salman Qlobal Ərəb Dili Akademiyasının hazırladığı platformada lüğət, təhsil və əyləncə xarakterli oyunlar yer alır. Oyunlarda dil məlumatlarından istifadə olunur və öyrənmə prosesi rəqabət elementləri ilə birləşdirilir.
Akademiya platformadakı oyunların sayını 100-dən çoxa çatdırmağı və 15 mindən çox sualdan ibarət məlumat bazası yaratmağı planlaşdırır. Platforma müxtəlif yaş və səviyyələrdə olan istifadəçilər, ərəb dili mütəxəssisləri, öyrənənlər və dilə maraq göstərən şəxslər üçün nəzərdə tutulub.
Platformada məktəblərə, universitetlərə və digər qurumlara əyani və ya onlayn yarışlar təşkil etməyə imkan verən Rəqəmsal Dil Oyunları Liqası da yaradılıb. İstifadəçilər həmçinin xüsusi auditoriyalar və təhsil məqsədləri üçün öz dil oyunlarını hazırlaya biləcəklər.
Akademiyanın baş katibi Abdullah Əl-Vəşmi bildirib ki, təşəbbüs ərəb dilini dəstəkləmək üçün süni intellekt və avtomatlaşdırılmış dil emalı texnologiyalarından istifadə səylərinin bir hissəsidir. Müəllimlərin dərs ideyalarını interaktiv oyunlara çevirməsinə imkan verən yeni funksiyanın da yaxın vaxtlarda istifadəyə verilməsi gözlənilir.
Platforma Süni İntellekt İli çərçivəsində istifadəyə verilib və qlobal miqyasda interaktiv ərəb dili öyrənmə vasitələrinə çıxışın genişləndirilməsi məqsədi daşıyır.
