BAKI,VOA, Analitik Təhlil Mərkəzi, Fərid Mikayılov

İran ətrafında baş verən hərbi gərginliklər yalnız siyasi və təhlükəsizlik deyil, həm də iqtisadi nəticələr doğurur.

İranın iştirak etdiyi münaqişələr qlobal miqyasda maliyyə axınlarını dəyişdirərək silah sənayesi, enerji şirkətləri və maliyyə bazarları üçün böyük qazanc imkanları yaradır.

Məlumata görə, müharibə dövründə bir sıra böyük investorlara və fondlara bazar dəyişikliklərindən əvvəl mövqe tutmaq imkanı yarandığı, bəzi hallarda isə “insayder məlumat sızması” ehtimallarının gündəmə gəldiyi qeyd olunur.

Qeyd edilir ki, ABŞ prezidenti Donald Trampın İranla bağlı açıqlamaları öncəsi neft və fond bazarlarında qeyri-adi aktivlik müşahidə olunub, bəzi investorlar isə qiymət dəyişikliklərindən milyonlarla dollar qazanc əldə edib.

Təhlillərə əsasən, müharibənin əsas iqtisadi qalibləri sırasında silah istehsalçıları, enerji şirkətləri və logistika sektorunda fəaliyyət göstərən qurumlar yer alır. Xüsusilə müdafiə sənayesi şirkətlərinin səhmlərində ciddi artım qeydə alınıb.

Bildirilib ki, neft və qaz qiymətlərinin yüksəlməsi enerji şirkətlərinə əlavə gəlir qazandırıb, eyni zamanda bəzi ölkələr, o cümlədən Çin və Rusiya daha ucuz enerji resurslarına çıxış əldə ediblər.

Eyni zamanda, dəniz daşımaları və sığorta sektorunda risklərin artması ilə əlaqədar qiymətlər dəfələrlə yüksəlib və bu sahələrdə fəaliyyət göstərən şirkətlər üçün əlavə gəlir mənbələri yaranıb.

Bununla yanaşı, ekspertlər qeyd edir ki, qazanc əsasən məhdud qrupda cəmləşir, halbuki müharibənin real yükü – inflyasiya, enerji qiymətlərinin artımı və insan itkiləri – daha geniş kütlələrə təsir göstərir.