BAKI,VOA, Fərid Mikayılov

Çinin xarici işlər naziri Van İ Pekində Türkmənistanın xarici işlər naziri Rəşid Meredov ilə görüş keçirib.

VOA xəbər verir ki, görüş Türkmənistan nümayəndə heyətinin Çinə səfəri çərçivəsində baş tutub.

Məlumata görə, Van İ Türkmən xalqının Milli Lideri, Xalq Məsləhətinin sədri Qurbanqulu Berdiməhəmmədovun Çin xalqının köhnə dostu olduğunu vurğulayaraq, iki ölkə liderləri arasında formalaşmış qarşılıqlı etimadın və dostluğun strateji tərəfdaşlığın inkişafında mühüm rol oynadığını bildirib.

Görüş zamanı tərəflər Çin və Türkmənistanın etibarlı tərəfdaş olduqlarını qeyd edərək, qarşılıqlı dəstəyin davam etdirilməsi və əməkdaşlığın daha da dərinləşdirilməsi istiqamətində hazır olduqlarını ifadə ediblər.

Türkmənistanın xarici işlər naziri Rəşid Meredov isə Çində keçirilən “iki sessiya” toplantılarının uğurla başa çatması münasibətilə təbriklərini çatdırıb və göstərilən qəbula görə təşəkkür edib. O, Türkmənistanın Çin lideri Si Cinpinin irəli sürdüyü qlobal təşəbbüsləri dəstəklədiyini və “Çin–Mərkəzi Asiya” III sammitinə hazırlıqda iştirak etməyə hazır olduğunu qeyd edib.

Tərəflər həmçinin İran ətrafındakı vəziyyət və digər beynəlxalq məsələlər üzrə fikir mübadiləsi aparıblar.