BAKI,VOA, Fərid Mikayılov

Müstəqil Dövlətlər Birliyinin (MDB) İqtisadi Şurasının növbəti, 111-ci iclası bu ilin sentyabr ayında Türkmənistanın paytaxtı Aşqabad şəhərində təşkil olunacaq.

VOA xəbər verir ki, hazırda tədbirin yüksək səviyyədə keçirilməsi üçün müvafiq hazırlıq işləri həyata keçirilir.

İclasın gündəliyinə uyğun olaraq, məhdud tərkibli görüşdə MDB-yə üzv dövlətlər arasında iqtisadi əməkdaşlığın mühüm məsələləri müzakirə ediləcək.

Həmçinin beynəlxalq daşımalar zamanı nəqliyyat təhlükəsizliyinin təmin edilməsi üzrə 2026–2030-cu illəri əhatə edən fəaliyyət planı və Şuranın növbəti iclasının keçirilməsi ilə bağlı məsələlər nəzərdən keçiriləcək.

Genişləndirilmiş tərkibli iclasda isə Dövlətlərarası Standartlaşdırma, Metrologiya və Sertifikatlaşdırma Şurasının 2023–2026-cı illər üzrə fəaliyyəti qiymətləndiriləcək.

Bununla yanaşı, Birlik ölkələrinin yüksək texnologiyalı sənaye sahələri üçün vacib resursların istehsalı üzrə əməkdaşlığın inkişafı Konsepsiyası və onun icrasına dair tədbirlər planının layihələri nəzərdən keçiriləcək.