BAKI, VOA, Orxan Qədirzadə
Yaxın Şərqdə davam edən müharibə fonunda Türkiyə Şimali Kiprdə təhlükəsizliyi gücləndirmək məqsədilə hərbi mövcudluğunu artırıb.
VOA xəbər verir ki, Türkiyə Müdafiə Nazirliyinin açıqlamasına görə, regionda baş verən son hadisələr nəzərə alınaraq Şimali Kipr Türk Respublikasına altı ədəd F-16 qırıcı təyyarəsi və hava hücumundan müdafiə sistemləri yerləşdirilib.
Nazirliyin bəyanatında bildirilib ki, bu addım bölgədə təhlükəsizliyi gücləndirməyə yönəlmiş mərhələli planlaşdırmanın bir hissəsidir və vəziyyətin inkişafından asılı olaraq əlavə tədbirlərin görülməsi də istisna edilmir.
Açıqlamada qeyd olunub ki, Türkiyə regiondakı vəziyyəti diqqətlə izləyir və ehtiyac yaranacağı halda Şimali Kiprdə təhlükəsizlik tədbirlərini daha da gücləndirəcək.
Son günlər Avropa dövlətləri də Kipr adasında hərbi mövcudluqlarını artırmağa başlayıb. Buna səbəb ötən həftə İranın müttəfiqi hesab edilən Livandakı Hizbullah təşkilatının istifadə etdiyi güman edilən pilotsuz uçuş aparatının Kiprdə yerləşən Böyük Britaniyanın Akrotiri hərbi bazasına zərbə endirməsi olub.
Regionda gərginlik ABŞ və İsrailin İrana qarşı hərbi əməliyyatlarının genişlənməsi ilə daha da artıb. Məlumata görə, Bu gün İran tərəfindən Türkiyə hava məkanına doğru buraxılan ballistik raket NATO-nun hava hücumundan müdafiə sistemləri tərəfindən zərərsizləşdirilib.
Türkiyə Avropa dövlətlərinin Kiprə hərbi qüvvə göndərməsini tənqid edərək bunun adanı daha geniş münaqişəyə cəlb edə biləcəyini bildirib.