BAKI,VOA,Yusif Şərifzadə

İsrailin xarici işlər naziri Gideon Saar bildirib ki, ölkəsi Türkiyə ilə münasibətlərdə gərginliyin daha da artmasında maraqlı deyil. Açıqlama İsrailin ötən həftə Suriyanın Əbu əd-Duhur hərbi hava bazasına endirdiyi zərbələrdən sonra Ankara ilə münasibətlərin gərginləşdiyi bir vaxtda verilib. Hücum Türkiyə tərəfindən pislənilib.

VOA xəbər verir ki, Saar İsrailin mövcud vəziyyətin qorunmasına sadiq olduğunu və yaranmış fikir ayrılıqlarının diplomatik yollarla həllinə üstünlük verdiyini bildirib.

“Biz Türkiyə ilə gərginliyin artmasında maraqlı deyilik. Mövcud vəziyyətin qorunmasına sadiqik”, – İsrailin xarici işlər naziri deyib.

Bununla belə, Saar İsrailin Suriyada Türkiyəyə məxsus hərbi bazaların yaradılmasını qəbul etməyəcəyini vurğulayıb. Bu məsələ son günlər Ankara ilə Təl-Əviv arasında yaranmış gərginliyin əsas səbəblərindən birinə çevrilib.

İsrail avqustun 18-də Suriyanın şimal-qərbindəki Əbu əd-Duhur hərbi hava bazasına səkkiz hava zərbəsi endirib. Hücum zamanı uçuş-enmə zolağı və anbar obyektləri vurulub, insan tələfatı qeydə alınmayıb.

İsrail rəhbərliyi hücumu Türkiyənin həmin bazada hərbi fəaliyyət planlaşdırdığına dair əldə edildiyi bildirilən kəşfiyyat məlumatları ilə əsaslandırıb. İsrail Türkiyə qüvvələrinin bazada yerləşdirilməsinin ölkənin təhlükəsizliyinə təhdid yaradacağını iddia edib.

Türkiyə isə İsrailin iddialarını rədd edib. Suriya tərəfi də Əbu əd-Duhurda Türkiyənin daimi hərbi bazasının yaradılması və ya Türkiyə qüvvələrinin daimi yerləşdirilməsi planının olmadığını açıqlayıb.

Əbu əd-Duhur hücumu ABŞ tərəfindən də tənqid olunub. ABŞ-nin Suriya üzrə xüsusi nümayəndəsi Tom Barrak zərbəni “lazımsız gərginləşmə” adlandırıb. O, İsrailin hücumdan əvvəl Vaşinqtonu xəbərdar etmədiyini bildirib, İsrailin müdafiə naziri İsrael Kats isə kəşfiyyat məlumatlarının ABŞ rəsmiləri ilə bölüşüldüyünü deyib.

Mövcud vəziyyət Türkiyə və İsrailin Suriyadakı təhlükəsizlik maraqları arasında fikir ayrılıqlarının daha açıq şəkildə üzə çıxmasına səbəb olub. Bununla belə, İsrail XİN-in son açıqlaması Təl-Əvivin Ankara ilə birbaşa qarşıdurmadan yayınmağa və məsələnin diplomatik yollarla həllinə üstünlük verdiyini göstərir.