BAKI,VOA Orxan Qədirzadə

Türkiyənin milli enerji proqramı çərçivəsində Diyarbəkirin Bismil və Silvan rayonları arasındakı ərazidə təxminən 4 min metr dərinlikdə aparılan işlər nəticə verib. Qeyri-ənənəvi üsullardan istifadə edilən qazma işləri zamanı yüksək keyfiyyətli şist nefti çıxarılıb.

Türkiyə rəsmilərinin açıqlamalarına görə, hasil edilən neftin keyfiyyətinin Yaxın Şərq ölkələrində çıxarılan neftlə müqayisə edilə biləcək səviyyədə olduğu bildirilir. Türkiyə Neft Korporasiyası (TPAO) bölgədə gecə-gündüz işlərini davam etdirir.

Diyarbəkirin Bismil-Silvan xətti ilə yanaşı, Sur rayonunun kənd ərazilərində də neft axtarışı məqsədilə qazma işləri aparılır. Davam edən layihələr fonunda Diyarbəkirin Türkiyənin əsas neft mərkəzlərindən birinə çevrilməsi gözlənilir.

Türkiyənin Enerji və Təbii Sərvətlər naziri Alparslan Bayraktar daha əvvəl Diyarbəkirdə ABŞ şirkəti ilə şist nefti üzrə qazma işlərinə başlanıldığını açıqlamışdı. Onun sözlərinə görə, bölgədəki ehtiyatların ümumi potensialı 540 milyard dollar qiymətləndirilir və hasilatın ölkə iqtisadiyyatına ildə 8 milyard dollar töhfə verə biləcəyi bildirilir.

TPAO bölgənin digər ərazilərində də kəşfiyyat işlərini davam etdirir. Vanın Muradiyə rayonunda qazılan quyuda işlər davam etdiyi halda, Hakkari və Şırnakda da yeni neft yataqlarının müəyyənləşdirilməsi istiqamətində araşdırmalar aparılır.