BAKI,AzerVoice, Fərid Mikayılov

ABŞ prezidenti Donald Tramp, Qəzzada əldə edilən tarixi atəşkəs razılaşmasında rol oynayan ölkələrə təşəkkür edib.

AzerVoice xəbər verir ki, Tramp açıqlamasında, “Bu tarixi və misilsiz hadisənin baş tutması üçün bizimlə birgə çalışan Qətər, Misir və Türkiyəyə təşəkkür edirəm” – deyə bildirib.

Tramp həmçinin bu razılaşmanın ərəb və müsəlman dünyası, İsrail, ABŞ və bütövlükdə region üçün mühüm əhəmiyyət daşıdığını vurğulayıb.

HƏMAS hərəkatı yayımladığı bəyanatda Qəzzada atəşkəs razılaşmasının əldə olunduğunu təsdiqləyib. Təşkilat bildirib ki, razılaşma müharibənin dayandırılması, işğalçı qüvvələrin çəkilməsi, humanitar yardımların girişinə icazə verilməsi və əsir mübadiləsini nəzərdə tutur.

“HƏMAS, Qətər, Misir və Türkiyədəki vasitəçilərin səylərini böyük minnətdarlıqla qarşılayır. Eyni zamanda, müharibənin tam bitməsi və İsrailin Qəzzə zolağından tam geri çəkilməsi istiqamətindəki səylərinə görə ABŞ prezidenti Donald Trampa da təşəkkürümüzü bildiririk” – deyə bəyanatda qeyd olunub.

Açıqlamada, İsrailin razılaşma öhdəliklərini yerinə yetirməsinin təmin olunması və bu prosesdən yayınmasına icazə verilməməsi çağırışı da edilib.

Qətər Xarici İşlər Nazirliyinin sözçüsü Macid əl-Ensari, sosial media platformasında paylaşdığı açıqlamada HƏMAS və İsrail nümayəndə heyətləri arasında Misirdə aparılan danışıqlarda razılıq əldə edildiyini bildirib. Ensarinin sözlərinə görə, razılaşma müharibənin dayandırılmasını, əsirlərin azad edilməsini və humanitar yardımların bölgəyə daxil olmasını təmin edəcək.

İsrailin baş naziri Benyamin Netanyahu da razılaşma ilə bağlı ilk dəfə açıqlama verib. O, “Tanrının izni ilə bütün əsirlərimizi geri qaytaracağıq,” – deyə qeyd edib.