BAKI,VOA Orxan Qədirzadə
Pakistan hökumətindəki mənbələr ABŞ və İran arasında diplomatik təmasların yenidən intensivləşdiyini bildiriblər. Məlumata görə, proses Pakistan və Qətərin vasitəçiliyi ilə davam edir və tərəflər son hərbi qarşıdurmaların dayandırılması üçün diplomatik həll yollarını müzakirə edirlər.
Müzakirə prosesi ilə tanış olan Pakistan rəsmilərinin Anadolu Agentliyinə (AA) verdiyi məlumata əsasən, ABŞ Prezidenti Donald Trampın orduya İrana qarşı yeni hücumlar həyata keçirməmək barədə göstəriş verdiyi iddialarından sonra Vaşinqton və Tehran arasında təmaslar daha da fəallaşıb.
Mənbələrin sözlərinə görə, Pakistan və Qətər hər iki tərəfə son qarşıdurmalardan əvvəlki vəziyyətə qayıdılması, daimi atəşkəsin əldə olunması və sülh danışıqlarının bərpasını nəzərdə tutan təklif təqdim edib.
Bildirilib ki, həm ABŞ, həm də İran bu təklifə cavab verərək, gərginliyin azaldılması və münaqişənin diplomatik yollarla həllinə müsbət yanaşdıqlarını ifadə ediblər.
Mənbələr hesab edirlər ki, hərbi əməliyyatlarda yaranan fasilə əvvəllər dayandırılmış danışıqların bərpası ilə bağlı ümidləri artırıb.
Hörmüz boğazında risk qalır
Bununla yanaşı, Pakistanlı mənbələr Hörmüz boğazı ətrafında əldə olunan nisbi sakitliyin hələ də kövrək olduğunu bildiriblər.
Onların sözlərinə görə, atəşkəsin pozulması və ya döyüşlərin yenidən başlaması ehtimalı yüksək olaraq qalır. Vasitəçi ölkələr gərginliyin yenidən artmasının qarşısını almaq məqsədilə həm Vaşinqton, həm də Tehranla daimi təmas saxlayırlar.
Trampın yeni hücum planını təsdiqləmədiyi iddia edilir
Daha əvvəl Axios nəşri adları açıqlanmayan mənbələrə istinadən yazmışdı ki, ABŞ Prezidenti Donald Tramp İrana qarşı əlavə hava zərbələrinin endirilməsi planını təsdiqləməyib və orduya yeni hücum həyata keçirməmək barədə göstəriş verib.
Eyni mənbələr ABŞ Silahlı Qüvvələrinin mümkün genişmiqyaslı hərbi əməliyyatlara hazırlıq planlarını isə davam etdirdiyini bildiriblər.
İslamabad razılaşması və son hadisələr
ABŞ və İsrailin İrana qarşı hərbi əməliyyatlarından sonra münaqişənin dayandırılması məqsədilə Vaşinqton və Tehran arasında 14 iyun tarixində İslamabad Razılaşması imzalanmışdı. Sənədə əsasən, yekun razılığın əldə olunması üçün 60 günlük danışıqlar müddəti nəzərdə tutulurdu.
Lakin 8 iyul tarixində ABŞ-ın İrana qarşı yeni hərbi əməliyyatlara başlamasından sonra Tehran cavab olaraq regiondakı ABŞ hərbi bazalarına zərbələr endirmiş, nəticədə danışıqlar prosesi yenidən dalana dirənmişdi.
Hazırda Pakistan və Qətərin vasitəçiliyi ilə aparılan diplomatik təşəbbüslərin tərəflər arasında gərginliyin azaldılmasına və sülh danışıqlarının bərpasına töhfə verəcəyi gözlənilir.