BAKI, AzerVoice, Fərid Mikayılov

Türkiyənin müdafiə sənayesində yeni addım atan ASELSAN, “Çelik Kubbe” hava hücumundan müdafiə sisteminə əlavə olunan yeni nəsil Anti-PUA silahı EJDERHA-nı təqdim edib.

AzerVoice xəbər verir ki, müdafiə eksperti Eray Güçlüer, sistemin texnoloji imkanlarını dəyərləndirərək onun həm dronlara, həm də mina və əl istehsalı partlayıcılara (EYP) qarşı əhəmiyyətli üstünlüklər qazandırdığını vurğulayıb.

Güçlüer bildirib ki, EJDERHA lazer texnologiyasından fərqli olaraq elektromaqnit dalğalarını yönləndirərək “elektromaqnit mərmi” istehsal edir. Bu üsul sayəsində, xüsusilə fiber-optik kabellə idarə olunan FPV dronlarının elektron sistemləri işıq sürətində təsirsiz hala gətirilir.

“Ənənəvi silahda mərminin hədəfə çatma vaxtı olur, EJDERHA isə hədəfi ani olaraq vurur” — deyə Güçlüer qeyd edib.

Ekspertin sözlərinə görə, sistemin ən mühüm üstünlüklərindən biri də eyni anda minlərlə “atış” həyata keçirə bilməsidir. Elektromaqnit dalğalarının təbiəti bu imkanı təmin edir və sürü halında hücum edən dronlara qarşı effektiv müdafiə təmin olunur.

EJDERHA yalnız hava hədəflərinə qarşı deyil, həm də torpaq altına gizlədilmiş partlayıcıların aşkarlanması və zərərsizləşdirilməsində istifadə edilə bilir. Güçlüer, bu texnologiyanın xüsusilə EYP-lərdən qaynaqlanan itkilərin qarşısının alınmasında həyati əhəmiyyət daşıdığını vurğulayıb.

Türk mühəndisləri tərəfindən hazırlanmış və patentləşdirilmiş sistem, ASELSAN-ın milli müdafiə sənayesində yaratdığı innovativ yanaşmaların nümunəsi kimi təqdim olunur.