BAKI,VOA Orxan Qədirzadə

NATO-da yeni dövrə qədəm qoyulur və Türkiyə müdafiə sənayesi sahəsində qlobal mövqeyini daha da gücləndirməyi hədəfləyir.

Bu barədə Türkiyənin vitse-prezidenti Cövdət Yılmaz bildirib.

Onun sözlərinə görə, son illərdə Türkiyənin müdafiə sənayesi əhəmiyyətli transformasiya mərhələsindən keçib. Müdafiə və aviasiya sənayesi məhsullarının ixracı son bir il ərzində 11 milyard ABŞ dollarını ötüb. İxracın yarıdan çoxu NATO müttəfiqləri və Avropa İttifaqına üzv ölkələrə həyata keçirilib.

Cövdət Yılmaz qeyd edib ki, Türkiyə hazırda dünyada müdafiə məhsulları ixrac edən ölkələr arasında 11-ci yerdə qərarlaşıb və yaxın gələcəkdə ilk 10-luğa daxil olmağı qarşıya məqsəd qoyub.

O vurğulayıb ki, NATO-nun Avropa sütununa mühüm töhfə verən Türkiyə, ilk növbədə Avropa İttifaqı olmaqla, qitədəki bütün müdafiə və təhlükəsizlik təşəbbüslərində iştirak edə bilməlidir.

Vitse-prezidentin sözlərinə görə, müttəfiq ölkələr arasında müdafiə sənayesi sahəsində tətbiq olunan ticarət məhdudiyyətləri və sanksiyalar aradan qaldırılmalıdır. O bildirib ki, əsassız məhdudiyyətlərin davam etməsi istehsal gücünün inkişafını ləngidəcək və xərclərin artmasına səbəb olacaq.

Cövdət Yılmaz əlavə edib ki, daha dayanıqlı Avro-Atlantik təhlükəsizlik sistemi istehsal potensialını, texnoloji imkanları və əməliyyat təcrübəsini ortaq strateji məqsədlər ətrafında birləşdirən təhlükəsizlik arxitekturası ilə mümkündür. Onun sözlərinə görə, Türkiyə bu təhlükəsizlik sistemində güclü, etibarlı və töhfə verən tərəfdaş kimi iştirak etməyə hazırdır.