BAKI,VOA Orxan Qədirzadə

Türkiyənin milli müdafiə sənayesi 2025-ci ildə ixrac üzrə tarixi nəticə əldə edib. Bu barədə Türkiyənin milli müdafiə naziri Yaşar Gülər Ankarada keçirilən Müdafiə Sənayesi İşgüzar Naharında məlumat verib.

Nazirin sözlərinə görə, Türkiyə ötən il 185 ölkəyə 230 adda müdafiə məhsulu ixrac edərək ümumilikdə 10 milyard 54 milyon dollar həcmində ixrac həyata keçirib.

Yaşar Gülər bildirib ki, əldə olunan nəticə ölkənin istehsal gücünün və beynəlxalq müdafiə bazarındakı rəqabət qabiliyyətinin artdığını göstərir. Onun sözlərinə görə, Türkiyə artıq qlobal müdafiə sənayesi təchizatçılarından birinə çevrilmək istiqamətində irəliləyir.

Nazir qeyd edib ki, hazırda Türkiyənin müdafiə sənayesi ekosisteminə 3 500-dən çox şirkət və 100 mindən artıq yüksəkixtisaslı mütəxəssis daxildir. Türk Silahlı Qüvvələrinin inventarındakı yerli istehsal məhsullarının payı isə 80 faizi ötüb.

Yaşar Gülər Türkiyə ilə ABŞ arasında müdafiə sənayesi sahəsində əməkdaşlığın genişləndirilməsinin vacibliyini vurğulayaraq, ortaq istehsal, elmi-tədqiqat layihələri və texnologiya transferi daxil olmaqla müxtəlif istiqamətlər üzrə ABŞ şirkətləri ilə əməkdaşlığa hazır olduqlarını bildirib.

Nazir əlavə edib ki, Türkiyə tərəfi bu istiqamətdə hazırladığı təklifləri ABŞ rəsmilərinə təqdim edib.

O, həmçinin Türkiyə gəmiqayırma sənayesinin imkanlarına diqqət çəkərək, ölkə tərsanələrinin ABŞ Hərbi Dəniz Qüvvələrinin tələblərinə uyğun hərbi gəmilər inşa etmək, eləcə də regionda fəaliyyət göstərən dəniz platformalarının texniki xidmət və təmirini həyata keçirmək potensialına malik olduğunu bildirib.

Yaşar Gülərin sözlərinə görə, NATO Zirvəsi çərçivəsində keçiriləcək Müdafiə Sənayesi Forumu alyans tarixində ilk dəfə rəsmi zirvə tədbiri statusu alıb. Forumun müdafiə sənayesi şirkətləri, dövlət qurumları və beynəlxalq tərəfdaşlar arasında yeni əməkdaşlıqların formalaşdırılmasına, eləcə də strateji layihələr üzrə sazişlərin imzalanmasına imkan yaradacağı gözlənilir.