BAKI,VOA Orxan Qədirzadə
Türkiyə Prezidenti Rəcəb Tayyib Ərdoğan Ankarada keçirilən NATO Dövlət və Hökumət Başçılarının 36-cı Zirvə toplantısının yekununda keçirdiyi mətbuat konfransında ölkəsinin müdafiə siyasəti, ABŞ ilə hərbi əməkdaşlıq, Yaxın Şərqdəki vəziyyət və NATO daxilində əməkdaşlıqla bağlı bir sıra mühüm açıqlamalar verib.
Ərdoğan bildirib ki, "Mavi Vətən" konsepsiyası Türkiyə üçün strateji əhəmiyyət daşıyır və Ankara bu anlayışdan istifadə etməyə davam edəcək. Onun sözlərinə görə, Türkiyənin daxili suları, ərazi suları, kontinental şelfi və müstəsna iqtisadi zonadakı hüquqlarının qorunması dövlət siyasətinin əsas istiqamətlərindən biridir.
Prezident NATO liderlərinin qarşılanması zamanı çıxış edən Osmanlı dövrünün hərbi musiqi kollektivi – Mehter ansamblının böyük maraq doğurduğunu da qeyd edib. O bildirib ki, bir çox lider bu çıxışı yüksək qiymətləndirib və tarixi ənənələrə maraq göstərib.
Ərdoğan zirvə iştirakçılarına ingilis dilində hazırlanmış "Cəsarət siyasəti: Ərdoğan və Türkiyənin yüksəlişi" adlı kitabı hədiyyə etdiyini də açıqlayıb.
ABŞ ilə münasibətlərə toxunan Türkiyə Prezidenti bildirib ki, Vaşinqtonun Ankaraya tətbiq etdiyi sanksiyaların böyük hissəsi artıq aradan qaldırılıb və bu istiqamətdə hazırda problem görmür.
O, ABŞ Prezidenti Donald Trampın Türkiyəyə F-35 qırıcılarının satışı məsələsinə müsbət yanaşdığını bildirib. Ərdoğanın sözlərinə görə, təyyarələr Türkiyəyə təhvil veriləcəyi halda, bu, ABŞ-ın verdiyi vədə sadiq qaldığını göstərəcək.
Türkiyə Prezidenti İsrail və Yunanıstanın Ankaranın F-35 proqramına qayıtmasına qarşı çıxmasını da tənqid edərək bildirib ki, bu mövqenin onun üçün heç bir əhəmiyyəti yoxdur və Türkiyənin müdafiə ehtiyaclarını qarşılamaq hüququ var.
Ərdoğan NATO daxilində müdafiə sənayesi sahəsində tətbiq olunan məhdudiyyətlərin aradan qaldırılmasına çağırıb. O qeyd edib ki, Türkiyə 2030-cu ilədək müdafiə xərclərinin ümumi daxili məhsulun 5 faizinə çatdırılması hədəfinə nail olmaq üçün zəruri addımları atır.
Onun sözlərinə görə, ölkə "Polad Günbəz" hava və raketdən müdafiə sistemi layihəsi üçün əlavə 24 milyard ABŞ dolları ayırıb. Prezident bildirib ki, bu sistem NATO-nun bölgədəki müdafiə imkanlarının gücləndirilməsinə mühüm töhfə verəcək.
Yaxın Şərqdəki vəziyyətə də toxunan Ərdoğan Türkiyənin Hörmüz boğazının yenidən tam fəaliyyət göstərməsi üçün səylərini davam etdirdiyini bildirib.
"Biz Hörmüz boğazının müharibə gölünə çevrilməsini istəmirik", – deyə Türkiyə Prezidenti vurğulayıb.
Ərdoğan həmçinin Qəzza zolağındakı humanitar vəziyyətin NATO Zirvəsində də gündəmə gətirildiyini bildirib. Onun sözlərinə görə, Türkiyə Qəzzada baş verənləri Yaxın Şərq üçün böyük humanitar fəlakət hesab edir və bölgədə sülhün və sabitliyin ən qısa zamanda bərpa olunmasının vacibliyini müdafiə edir.