BAKI,VOA,Yusif Şərifzadə

Küveyt Xarici İşlər Nazirliyi ölkənin elektrik stansiyalarından biri və dəniz suyunun duzsuzlaşdırılması zavoduna raket və pilotsuz uçuş aparatları (PUA) ilə həyata keçirildiyini bildirdiyi hücumları kəskin şəkildə pisləyib.

VOA xəbər verir ki, nazirliyin yaydığı bəyanatda hücumlar "İranın ağır təcavüzü" kimi qiymətləndirilib.

Bəyanatda bildirilir ki, sözügedən hücumlar Küveytin suverenliyinin, milli təhlükəsizliyinin və ərazi bütövlüyünün açıq şəkildə pozulması, eyni zamanda beynəlxalq hüquq və beynəlxalq humanitar hüququn ciddi şəkildə pozulması hesab olunur.

Küveyt Xarici İşlər Nazirliyi vurğulayıb ki, bu cür hərəkətlərin davam etməsi regional təhlükəsizlik və sabitlik üçün "son dərəcə təhlükəli eskalasiya" yaradır, beynəlxalq legitimliyə meydan oxuyur və gərginliyin azaldılması, eləcə də sülh yolu ilə həll səylərinə zərbə vurur.

Nazirlik həmçinin bəyan edib ki, Küveyt beynəlxalq hüququn müddəalarına uyğun olaraq öz suverenliyini, təhlükəsizliyini və sabitliyini qorumaq üçün zəruri tədbirlər görmək hüququna malikdir.

İran tərəfi Küveytin bu bəyanatına və hücumlarla bağlı ittihamlarına hələlik rəsmi münasibət bildirməyib. İttihamlar müstəqil mənbələr tərəfindən də təsdiqlənməyib.