BAKI,AzerVoice

Türkiyə Milli Müdafiə Nazirliyi (MSB) İran–İsrail qarşıdurması fonunda ölkə sərhədlərində nəzarətsiz miqrasiya axınının olmadığını bildirib.

AzerVoice xəbər verir ki, İran da daxil olmaqla bütün sərhədlərdə əlavə tədbirlər görülüb və intensiv təhlükəsizlik nəzarəti həyata keçirilir.

Açıqlamada qeyd olunub ki, Türk Silahlı Qüvvələri (TSK) sərhəd təhlükəsizliyini təmin etmək üçün ən müasir texnoloji sistemlərlə 24 saat fəaliyyət göstərir. İran sərhədi də daxil olmaqla bütün istiqamətlərdə müşahidə, nəzarət və patrul tədbirləri yüksək səviyyədə həyata keçirilir.

MSB rəsmiləri bildiriblər ki, İsrailin İranın nüvə və hərbi obyektlərinə hücumları ilə başlayan qarşıdurmadan dərhal sonra Türkiyənin hava məkanı və sərhədlərində təhlükəsizlik tədbirləri gücləndirilib.

“İsrailin bölgədəki hərbi ritorikası və hücumları regional sabitliyi pozur. Bu ritorikadan və hücumlardan dərhal imtina edilməlidir” – deyə açıqlamada vurğulanıb.

MSB, İsrail təyyarələrinin Türkiyə hava məkanını pozmasına dair yayılan məlumatları təkzib edib. Açıqlamada bildirilir ki, hücumların başladığı ilk andan etibarən hava hərəkətliliyi izlənib və ehtiyat tədbiri olaraq Türkiyənin reaksiya və patrul təyyarələri havaya qaldırılıb.

Nazirlik əlavə edib ki, Türkiyə hava və raket hücumlarına qarşı çoxqatlı və inteqrə olunmuş müdafiə sistemini inkişaf etdirməkdə davam edir. Yerli və milli radar, hava hücumundan müdafiə silahları və komanda idarəetmə imkanları bu çərçivədə genişləndirilir.

Sərhəd təhlükəsizliyi çərçivəsində son bir həftədə 122 nəfər saxlanılıb, onlardan 2-si terrorçu olub. Bu ilin əvvəlindən bəri qeyri-qanuni sərhəd keçidi cəhdlərinə qarşı 38 min 979 nəfərin qarşısı alınıb.