BAKI,VOA,Yusif Şərifzadə

HƏMAS-ın yeni rəhbəri Xəlil əl-Həyyə vəzifəyə təyin olunmasından sonra ilk bəyanatında Qəzzada atəşkəs və zorakılığın dayandırılması istiqamətində vasitəçilik edən Misir, Qətər və Türkiyəyə təşəkkürünü bildirib.

VOA xəbər verir ki, Xəlil əl-Həyyə İsrailin Qəzzada davam edən hərbi əməliyyatları fonunda daha çox qan tökülməsinin qarşısını almaq üçün vasitəçilərin göstərdiyi səyləri yüksək qiymətləndirdiyini deyib.

O bildirib ki, Misir, Qətər və Türkiyə Qəzza zolağında zorakılığın dayandırılması istiqamətində bütün imkanlardan istifadə edərək fəal diplomatik səylər göstərirlər.

Əl-Həyyə, həmçinin danışıqlar prosesinə himayədarlıq edən dövlətləri İsrail hökumətinə razılaşdırılmış öhdəliklərin yerinə yetirilməsi üçün daha ciddi təzyiq göstərməyə çağırıb.

Yeni HƏMAS lideri hesab edir ki, əldə olunmuş razılaşmaların icrası bölgədə gərginliyin azaldılması və humanitar vəziyyətin yaxşılaşdırılması baxımından mühüm əhəmiyyət daşıyır.

Bu bəyanat Xəlil əl-Həyyənin bazar ertəsi HƏMAS rəhbəri seçilməsindən sonra verdiyi ilk rəsmi açıqlamalardan biri hesab olunur.