BAKI,VOA Orxan Qədirzadə

Türkiyədə 2026-cı ilin iyun ayında daşınmaz əmlak bazarında aktivlik artıb. Türkiyə Statistika Qurumu (TÜİK) tərəfindən açıqlanan məlumatlara görə, ay ərzində ölkə üzrə 129 min 979 mənzil satışı həyata keçirilib. Bu göstərici ötən ilin eyni ayı ilə müqayisədə 15,8 faiz artım deməkdir.

Məlumata əsasən, iyunda satılan mənzillərin 43 min 406-sı yeni tikililər, 86 min 573-ü isə ikinci əl mənzillər olub. Yeni mənzil satışları illik müqayisədə 23,1 faiz, ikinci əl mənzil satışları isə 12,5 faiz artıb. Ümumi satışlarda yeni mənzillərin payı 33,4 faiz, ikinci əl mənzillərin payı isə 66,6 faiz təşkil edib.

İpoteka ilə satışlar 72 faiz artıb

Statistik göstəricilər Türkiyə mənzil bazarında kreditli alışların da sürətləndiyini göstərir. İyun ayında 25 min 993 ipotekalı mənzil satışı qeydə alınıb. Bu, 2025-ci ilin iyun ayı ilə müqayisədə 72,1 faiz çoxdur.

Digər satış növləri üzrə isə 103 min 986 mənzil satılıb və illik artım 7,1 faiz olub. Ümumi satışların 20 faizi ipotekalı, 80 faizi isə digər satış formaları vasitəsilə həyata keçirilib.

İlk 6 ayda satışlar 700 minə yaxınlaşıb

2026-cı ilin yanvar–iyun aylarında Türkiyədə ümumilikdə 699 min 516 mənzil satılıb. Bu göstərici ötən ilin eyni dövründəki 721 min 828 satışla müqayisədə 3,1 faiz azdır.

Altı aylıq dövrdə yeni mənzil satışları 221 min 487, ikinci əl mənzil satışları isə 478 min 29 təşkil edib. İpoteka ilə satışlar isə əvvəlki ilin ilk yarısı ilə müqayisədə 32,2 faiz artaraq 142 min 794-ə yüksəlib.

Əcnəbilərə satışlar artıb

Türkiyədə xarici vətəndaşlara mənzil satışları da iyunda yüksəlib. Ay ərzində əcnəbilər 2 min 15 mənzil alıb. Bu, illik müqayisədə 20,1 faiz artımdır.

2026-cı ilin ilk yarısında isə xaricilərə satılan mənzillərin sayı 9 min 83 olub ki, bu da ötən ilin eyni dövrü ilə müqayisədə 9,2 faiz azdır.

İyun ayında Türkiyədən ən çox mənzil alan xarici vətəndaşlar sırasında Rusiya Federasiyası vətəndaşları 381 mənzillə birinci olub. Ukrayna və İran vətəndaşları isə hər biri 170 mənzillə növbəti yerləri tutub.