BAKI,AzerVoice, Fərid Mikayılov

Almaniyanın Leypsiq klubu, niderlandlı futbolçu Xavi Simons üçün verilən təkliflərdə yalnız “iqtisadi məna” olduğu halda satışa razılıq verəcəklərini açıqlayaraq Çelsiyə sərt xəbərdarlıq edib.

AzerVoice xəbər verir ki, İngiltərə təmsilçisi yay transfer pəncərəsində fəal olsa da, hədəflərindən biri Simons olaraq qalır.

Lakin Bundesliqa nəhəngləri, “əfsanəvi istedad” kimi dəyərləndirilən oyunçunun transferində güzəştə getməyəcəklərini bildiriblər. Klub, futbolçuya ən azı 70 milyon avro qiymət qoyub.

Məlumata görə, Simons ötən mövsüm Leypsiqin Çempionlar Liqasına vəsiqə qazana bilməməsindən sonra klubdan ayrılmaq istədiyini rəhbərliyə çatdırıb. Rəhbərlik isə futbolçunun istəyinə hörmətlə yanaşacağını desə də, yalnız sərfəli şərtlərlə satışa icazə veriləcəyini vurğulayır.

Çelsinin Simons transferini reallaşdırmaq üçün açar məqam Kristofer Nkunkunun gələcək taleyinə bağlıdır. Fransalı futbolçu ilə bağlı Bavariya maraqlıdır, lakin londonlular onu icarəyə buraxmaq istəmir, əksinə 40 milyon avro qarşılığında satmaq niyyətindədirlər. Nkunku isə müqaviləsi 2029-cu ilə qədər davam etdiyindən müvəqqəti keçidə qarşıdır.