BAKI,VOA, Fərid Mikayılov
Almaniya kansleri Fridrix Merts və Fransa Prezidenti Emmanuel Makron Köln yaxınlığındakı Nörvenix Hərbi Hava Bazasında keçirilən 26-cı Fransa–Almaniya Nazirlər Şurasının iclasından sonra müdafiə, Ukrayna və Çinlə bağlı əməkdaşlığın genişləndiriləcəyini açıqlayıblar.
VOA xəbər verir ki, Merts bildirib ki, Almaniya bu il Fransa ordusunun keçirəcəyi nüvə təlimində iştirak edəcək.
"Ortaq doktrinanın formalaşdırılması istiqamətində işlərlə yanaşı, Almaniyanın konvensional silahlı qüvvələri bu il Fransa ordusunun nüvə təliminə qatılacaq", – deyə kansler vurğulayıb.
O qeyd edib ki, Fransa və Almaniyanın yaratdığı strateji istiqamətləndirmə qrupu gələcəkdə nüvə çəkindiriciliyinin necə gücləndirilə biləcəyini müzakirə edəcək.
Merts əlavə edib ki, bu təşəbbüs NATO-nun nüvə paylaşımı və çəkindiricilik siyasətinə alternativ deyil, əksinə onu tamamlayır.
Bununla yanaşı, Almaniya Fransanın təşəbbüsü ilə payızda keçiriləcək Ukrayna ilə bağlı hərbi təlimlərdə də iştirak edəcək. Kansler təlimdə iştirakın formatının yaxın vaxtlarda dəqiqləşdiriləcəyini bildirib.
Sözügedən təlim Ukraynaya dəstək verən ölkələrin yaratdığı "Könüllülər Koalisiyası" çərçivəsində təşkil olunacaq. Makron daha əvvəl bildirmişdi ki, təlimlərin məqsədi müharibədən sonra Ukraynada yerləşdirilməsi planlaşdırılan Çoxmillətli Ukrayna Qüvvələrinin hazırlıq səviyyəsini yoxlamaqdır.
İki ölkə lideri iqtisadi məsələlərə də toxunaraq, Çinin ticarət siyasətinə qarşı ortaq mövqe formalaşdıracaqlarını açıqlayıblar.
Makron bildirib ki, Fransa və Almaniya sentyabr ayına qədər Çinin "ədalətsiz ticarət təcrübələrinə" qarşı birgə yol xəritəsi hazırlamağı hədəfləyir.
"Hazırda Pekinin ticarət siyasəti səbəbindən ciddi təzyiqlə üz-üzəyik", – deyə Fransa prezidenti vurğulayıb.
Makron iqtisadiyyat, maliyyə və xarici işlər nazirlərinə bu istiqamətdə ortaq plan hazırlamaq tapşırığı verildiyini bildirib. O, həmçinin Avropa Komissiyasının bazar araşdırmaları aparmaq və Avropa sənayesini qorumaq sahəsində səlahiyyətlərinin gücləndirilməsini dəstəklədiklərini qeyd edib.
Merts isə Avropa İttifaqının Çinlə ticarət kəsirinin son illərdə sürətlə artdığını xatırladaraq, bunun Avropa sənayesi üçün ciddi problem yaratdığını bildirib.
Qeyd edək ki, Avropa İttifaqı dövlət subsidiyaları hesabına dəstəkləndiyi iddia olunan Çin məhsullarının Avropa bazarına təsirinə qarşı vahid siyasət hazırlamağa çalışır. Bu məsələdə Fransa daha sərt mövqedən çıxış etdiyi halda, Çin bazarında iri investisiyalara malik Almaniya indiyədək daha ehtiyatlı siyasət yürüdüb.