BAKI,VOA, Fərid Mikayılov

Almaniya ABŞ-dən "Tomahawk" qanadlı raketləri satın alacaq və onları ölkə ərazisində yerləşdirəcək.

VOA xəbər verir ki, bu barədə Almaniya kansleri Fridrix Merts Federal Məclisdə çıxışı zamanı bildirib.

Kanslerin sözlərinə görə, NATO-nun Ankarada keçirilən sammiti gözləntilərdən daha uğurlu nəticələrlə başa çatıb və Alyans birlik, güc və çəkindirmə potensialını daha da artırıb.

Fridrix Merts qeyd edib ki, Almaniya müdafiə xərclərini planlaşdırıldığından daha tez ümumi daxili məhsulun 5 faizi səviyyəsinə çatdıracaq.

O bildirib ki, NATO sammiti çərçivəsində ABŞ ilə əldə olunan razılaşmaya əsasən, Almaniya ABŞ istehsalı olan "Tomahawk" qanadlı raketlərini satın alacaq və onları ölkədə yerləşdirəcək.

"Beləliklə, müdafiə sistemimizdə mövcud olan mühüm strateji boşluğu aradan qaldırırıq. Bununla yanaşı, Avropada öz müdafiə sistemlərimizi inkişaf etdirmək və yerləşdirmək istiqamətində də fəaliyyətimizi davam etdirəcəyik", – deyə Merts vurğulayıb.

Kansler NATO-nun transatlantik alyans olaraq qalacağını qeyd edərək, Avropa ölkələrinin təhlükəsizliyinə görə ilk növbədə özlərinin məsuliyyət daşıdığını bildirib.

O, həmçinin Almaniyanın müdafiə sənayesinin gücləndirilməsinin hökumətin əsas prioritetlərindən biri olduğunu vurğulayıb.