BAKI,VOA

Səhərləri enerjili başlamaq üçün bir neçə sadə vərdiş yaratmaq, enerjinizi artırmaqla yanaşı, gün ərzində daha məhsuldar olmağınıza da kömək edəcək. Səhər nə edəcəyinizi öncədən planlaşdırın, bu, günü aydın bir məqsədlə başlamağınıza şərait yaradacaq.Mütəxəssislər günə gümrah başlamaq və zehni olaraq tam hazır olmaq üçün aşağıdakı vərdişləri müntəzəm tətbiq etməyi tövsiyə edirlər:

Yuxu rejimini qoruyun: Hər gün eyni vaxtda oyanmağa çalışın. Bu, bioloji saatınızın nizamlı olmasına kömək edəcək.

Oyandıqdan dərhal sonra su için: Oyanandan sonra bir stəkan su için, su içmək bədəninizdə maddələr mübadiləsini sürətləndirəcək. Həmçinin səhər yorğunluğunu azaldacaq.

Günün hədəflərini müəyyənləşdirin: Oyandıqdan sonra ilk olaraq gün ərzində edəcəyiniz işləri düşünün. 2-3 əsas məqsəd təyin edin. Bu, diqqətinizi toplamağa kömək edəcək.

Günəş işığından faydalanın: Günəş işığı almaq bioloji saatınızı tənzimləyərək enerji səviyyənizi yüksəldəcək. Pəncərəni açıb gün işığından faydalana və ya qısa bir gəzinti edə bilərsiniz.

Yüngül fiziki aktivlik edin: Səhər edəcəyiniz yüngül idman (yoqa, dartınma hərəkətləri və ya 10-15 dəqiqəlik gəzinti) qan dövranınızı sürətləndirərək enerji səviyyənizi artıracaq və bədəninizi yeni günə hazırlayacaq.

Sağlam səhər yeməyinə üstünlük verin: Sağlam səhər yeməyi gün ərzində ehtiyac duyulan enerjini təmin edir. Zülal, mürəkkəb karbohidratlar və sağlam yağlar ehtiva edən bir yemək seçin (məsələn: yumurta, yulaf və meyvə).

Zehni hazırlıq üçün vaxt ayırın: Səhər stressli bir başlanğıc etməkdənsə, özünüzə bir neçə dəqiqə ayırın. Meditasiya, dərin nəfəs hərəkətləri və ya sakit oturmaq zehni olaraq günə hazırlaşmağınıza kömək edəcək.

Günə pozitiv düşüncələrlə başlayın: Günü müsbət düşüncələrlə başlamaq çox önəmlidir. Səhərlər özünüzə müsbət xatırlatmalar edə və ya ilham verici sözlər oxuya bilərsiniz. Bu, zehni olaraq sizi daha çox motivasiya edəcək.

Bu vərdişləri müntəzəm olaraq tətbiq etməklə, səhərləri daha enerjili və pozitiv başlaya bilərsiniz.