BAKI, AzerVoice, Nailə Babazadə

Misir ordusu Sinay yarımadasında hərbi varlığını gücləndirib.

AzerVoice xəbər verir ki, rəsmi məlumatlara görə, bölgəyə 40 minə yaxın əsgər yerləşdirilib. Bu rəqəm, 1979-cu ildə İsraillə imzalanmış sülh müqaviləsində nəzərdə tutulan limiti təxminən iki dəfə üstələyir.

Qərarın səbəbi Misirin narahatlığı ilə bağlıdır. Rəsmi Qahirə ehtiyat edir ki, İsrailin Qəzzanı tam işğal planı fələstinlilərin kütləvi şəkildə Şimal Sinaya köçməsinə gətirib çıxara bilər.

Yüksək vəzifəli hərbi mənbənin sözlərinə görə, Misir ordusu “son illərin ən yüksək döyüş hazırlığı vəziyyətinə” gətirilib. Bu qərar prezident Əbdülfəttah əs-Sisinin göstərişi ilə, Silahlı Qüvvələrin Ali Şurası və Milli Təhlükəsizlik Şurasının iclasından sonra qəbul olunub.

Misir hərbçiləri hazırda Şimal Sinayın müxtəlif bölgələrində, o cümlədən Qəzza ilə sərhəddə yerləşən “C zonasında” mövqe tutub. Bu ərazi sülh müqaviləsinə görə ən sərt hərbi məhdudiyyətlərin tətbiq olunduğu sahədir.

Qahirə bildirir ki, bütün bu tədbirlər yalnız müdafiə xarakteri daşıyır və əsas məqsəd fələstinlilərin məcburi köçürülməsinin qarşısını almaqdır.

Misir, əlavə qüvvələrin yerləşdirilməsi barədə İsraili rəsmi şəkildə məlumatlandırıb. Lakin Tel-Əviv tərəfi sülh müqaviləsi ilə müəyyən edilmiş hərbi limitlərin aşılmasından və məhdud giriş zonalarında qoşunların yerləşdirilməsindən narazılıq ifadə edib.