BAKI,VOA,Yusif Şərifzadə

Livan parlamentinin Beyrutdan seçilmiş yunan-pravoslav deputatı Melhem Xələf İsrail ordusunun nəzarətində olan Livan ərazilərinə israilli məskunlaşanların təkrar daxil olmasını ölkənin suverenliyi və ərazi bütövlüyünə qarşı ciddi təhdid kimi qiymətləndirib.

VOA xəbər verir ki, Livanın Milli Xəbər Agentliyinin yaydığı məlumata əsasən, Xələf bildirib ki, bu hadisələr "sadəcə sərhəd insidenti deyil, Livanın suverenliyi və ərazi bütövlüyünə qarşı birbaşa hücum, həmçinin yeni reallığın güc yolu ilə qəbul etdirilməsi cəhdidir".

Deputat vurğulayıb ki, hadisələrdə mülki şəxslərin iştirak etməsi bu hərəkətlərin mahiyyətini dəyişmir. Onun sözlərinə görə, israilli məskunlaşanların fəaliyyəti İsrail hərbi qüvvələrinin dəstəyi ilə həyata keçirilir.

Melhem Xələf baş verənləri "aqressiv hərəkətlər" adlandıraraq beynəlxalq ictimaiyyətin diqqətini məsələyə yönəltməyə çağırıb.

O, Birləşmiş Millətlər Təşkilatını və Livandakı BMT Müvəqqəti Qüvvələrini (UNIFIL) təcili tədbirlər görməyə səsləyib. Deputat məskunlaşanların qarşısının alınmasını, hadisələrin rəsmi şəkildə sənədləşdirilməsini və onların BMT Təhlükəsizlik Şurasına təqdim edilməsini tələb edib.

İsrail tərəfi Melhem Xələfin səsləndirdiyi ittihamlara hələlik rəsmi münasibət bildirməyib. Məlumat müstəqil mənbələr tərəfindən də təsdiqlənməyib.